Dimapur nung civilian volunteers memelar

Dimapur, March 29 (Agencies): Dimapur district administration-i Dimapur telongtet nung civilian volunteer tem entry points nung memendaktsütsü telemtetba agiogo.
Nagaland ajunga shibangtsü tenzükba sülen Dimapur kübok Karbi Anglong den arrtsütepa aliba tesem kar nung lanur volunteers mapa lemzükja inyakdaktsür. Mezüngbo iba ya police den yaritepa ama liasü saka linük ajungalen nisung o nisung tsüngda metre kabosa tepila ayutsü tetuyuba agütsüba den meputepi aküm.
Volunteer aser police temi nüka mitdang parnok telong junga noktakteper aliba noksatem social media nunga prokshia liasü.
Iba nung ajemdaker, Dimapur Deputy Commissioner-i “Hombar nungi entry points nung sorkar nübotem dak alia tangar shinga mapa lemzüka meinyakdaktsütsü” ta tetuyuba ka agütsüogo.
Nisung telongjunga adenshiba nung lendong keta aliba dang masü saka tang ya district ajungalen CrPC section 144 ozüng agüja lir aser iba ajanga nisung 5 dak tema madenshitsü ashir, ta Deputy Commissioner-isa ashi.
Dimapur district nung medical personnel aser tanga essential services senzüsenbongba nung timtem kecha magütsütsüla, ta paisa nenshia metetdaktsüogo.