Home Commissioner-i COVID-19 indang osang metetdaktsü

Dimapur, March 29 (TYO): Deobar nikongtsütsü 3:00 ako nung Nagaland Home Commissioner, Abhijit Sinha, IAS-i state nung Covid-19 indang osang metetdakja liasü.
March 6, 2020 sülen tangalen nungi arur, kaketshirtem dena nisung 3982-i pei pei District Surveillance Team nem osang sangoktsü aser home quarantine nung liasü, ta pai ashi.
Nisung 3982 nungi 3590 tashi tang home quarantine nung lir aser parnok 392 bo quarantine mapang temogo, ta Abhijit Sinha-isa shisem.
Health & Family Welfare department-i district 11 nem PPE 740 agütsüogo. Itemji
Kohima nem 200, Dimapur nem 100, Mokochung aser Mon shia nem 90, Wokha nem 50, Tuensang, Phek & Zunheboto shia nem 40 aser Kiphire, Peren & Longleng nem 30 agütsü.
Tanüngba PPEs ji State headquarters nung yua lir. Maneni, department-i rongdak nüngdak atema Ambulance 133 tashi renema lir. Ambulance temji arogo, Para Military, NGOs, kija, nija aser sorkar mozü kitem indang lir, ta Home Commissioner-isa ashi.
“Yashi, March 28, 2020 nü Nagaland Chief Minister-i n-Covid Nagaland app sayatsüba nung nisung 1523-i tanü tashi nung tenüng register süogo. Nisung 312-i osang tejangja magütsü lir anungji nenokia iba app nung register asütsü mepishir. March 6, 2020 sülen tangalen nungi Nagaland-i arur ajaki app nung register asütsü metetdaktsür” ta Abihjit-isa nenshia metetdaktsü.
Tang tashi nung samples 22 tashi tendangtsü atema bener yok aser iba nungi 17 negative ta osang nguogo aser 5 indang osang ano mangu lir, ta paisa shisem.
“Nagaland ajungalen tongtipang tenüngdaktsütem aser osettem peria dang lir. Iba indang osang ya anogoshia metetpelar. Nagaland nung aliba FCI godown tem nung ita sem ser tesadang achitsüsa PDS jangotsü peria dang lir” ta Abhijit-isa metetdaktsü.
“Covid-19 ajanga state ajunga shibangba mapang State Level Control Room ka lapoka lir. Anungji timtem mesüra tetsükdaktsü ajurudang 0370- 2291122 aser 0370-2291120 ajanga tongteptsü metetdaktsür. Nagaland nungi nisung kar danga tangalen anendaka lira mesüra timtem kar ajurura, item number ajanga osang sangoktsütsü shisemer” ta Home Commissioner-isa ashi.
“Sorkari tuyuba ama public-i maneni kidang dang amongtsü aser dokani shishii aodang, tepila ayutsü nenshir” ta paisa shisem.
Ano külen, osangbener Nagaland Chief Secretary dang Centre-i Covid-19 atema state balala nem sen agütsüba indang osang metetnüa asüngdangdang “Nangzüka aliba dak alaka tang tashi nunga Centre nungibo ano sen meyok” ta pai langzü.
“Asen state sasep nung aliba rongsen amshia Covid-19 anema mapa inyaker. Centre nungi ano sen kecha mangu lir aser kodang ngudir osang metetdaktsütsü” ta paisa ashi.