Khonoma Youth Organization aser Youth Organization nati khukua aitsür

Dimapur, Metsüremi/March 30, 2020 (TYO): Dimapur nung March 16, 2020 nü (Hombar) züngsem tajung, Er Kevinguto Khate dang taochi mesayui tepsetba yutsüba osang angazüka Khonoma Youth Organization (KYO)-i tejashi den iba tako marok lemsateper, ta Khonoma Youth Organization-i metetdaktsü.
Asür Er Kevinguto ya sempet tajung aketba aser mapa meranga inyakba den ajaki meimba lanur ka liasü. Pa asüba ya par kibong aser Khonoma nung alir nüburtem atema dang masü saka Naga nunger ajunga atema takoksa tulu lir. Pa taküm samaba ya kecha agia meyipa bener marutet aser iba ya ajanga par kibong nung ongdang tuluka adokdaktsüogo.
Iba ama taochi mesayui aser nisung taküm ka mapayui tepseta yutsüba maparen ya KYO-i khukhua aitsür aser aibelenertem tekaratiba nung pua ozüng agi melaba ama tapet temerenshi agütsütsü asoshi ozüng amshir dang mepishir, ta parnoki ashi.
Nüji tangatetba aliba lokti ka nung iba amala maparen magizüker aser ibala inyakyim ya kija aser lokti ajungai aitsütsüla, ta KYO-isa shisem.
Ozüng-i melaba ama tim ketdangsertemi takaratiba nung ochi obendang agütsütsü imlar, parnokisa ashi.
Khonoma Youth Organization tenüng nung President Mhiesilhukho Yalie aser General Secretary Mhiesisokho Chase nati asür kibong den mangyim tejashi lemsateper aser Tulusang Tsüngremi asür kinunger ajak mulung nung tesünep agüjangma ta sarasademtsüba metetdaktsü.
Maneni, Angami Youth Organization (AYO)-ia, March 16, 2020 anogo asür Rokozhasie Khate’er jabaso Er. Kevinguto Khate dak taochi mesayui tepseta yutsüba osang anagashia aoksaba lemsatepogo.
Tentet nung ajaki akhümtsübuba züngsem, asür Khate ya National Institute of Technology (NIT), Chumoukedima, Dimapur nung assistant professor ka ama inyaka liasü. Pa ya takok tajung anguba shisahir ka, shiba doctorate degree angutsüba den külemi lokti atema teimla ka liasü, ta AYO-i ashi.
AYO nung züngsem tajung dak taochi mesayui taküm agiba maparen ya tentet ajanga aitsür aser lokti tepor junga meraketa aliba raksatsütsü asoshi kari telok nungi tajungtiba ka shimteta taküm samatsüba asalentong maparentem metetner, ta parnoki ashi.
“Iba ama ashikülak maparen ya onoki odangbo meyutsütsü, saka mapangshia lokti nung iba ama maparen atalokba anema noktaktsü onoki renema lir. Iba maparen nung densema alir temulung melemi bilemertem aputsü asoshi police department dang mepishiba mapang, aibelenertem tekaratiba nung pua ozüng agi melaba ama parnok nem ochi obendang agütsütsü asoshi onoki mepishir” ta AYO-isa metetdaktsü.
Angami Youth Organisation-i asür kibong den mangyim tejashi lemsateper aser Tsüngremi mangyimer mulung nung tesünep agüjangma ta sarasademtsür.