Dimapur Naga Students’ Union-i sorkar dak temulung masür

Dimapur, Metsüremi/March 30 (TYO): Sorkar ajanga nüburtem lokti nungi pila alitsü totuyuba agüja liaka Hombarnü Dimapur nung nüburtem adenshia aser nungtepa osettsüset balala alitepba ngua Dimapur Naga Students’ Union (DNSU) mepelaba lemsatep.
Media Cell DNSU ajanga sangdong ka nung ashiba agi, nisung o nisung tsüngda metre ka alitsü tuyuba yimya mamshie nüburtem sadem-sadema senzükba ngua Union kanga aoksar, aser ibai nüburtem asü sorkar tebilemtsü, ta asüngdang.
Principal Secretary and Home Commissioner, Abhijit Sinha dang, ketdangsertem aser lokti tentet balala den shisa lemsateper totuyuba ya agütsür asü odang agütsür, ta DNSU-i asüngdang, kechiaser Dimapur ya tesem tulu aser Nagaland nung nütsüng timtiba adenshia aliba tesem rongnung ka lir, anungji sorkar ketdangsertemi ozüng mapa küma inyaktsü tasakba kümdaktsür, ta ashi.
Village/Colony councils aser Youth organization temi anepalua volunteer temi bendanga agütsür administration, police aser medical department den yarisema state shibangba mapa nung mezüng sür nokdaka aser nüburtem oli-oraba kanga junga meita liasü, saka sorkari lokti tentet dang state shibangba nung shilem magitsü tenokdangba agütsüba sülen tanüsa (Hombarnü) iba süngjang nguogo, ta DNSU ajanga ashi.
Sorari COVID-19 tendangba aser anepaluba angadi asütsü ta sangdongba aser mera balala agiba atema pelar, saka iba tashidak wara ya state tesem ajungaleni meprokshi tsüngda mapa tali inyaktsü ajungshir, ta Dimapur Naga Students’ Union ajanga ashi.
Maneni DNSU-isa sorkar dang, tezüluba kija nung masü saka sorkari anir mapa agia inyaka tajangzük tali angutsü mechi ketdangser aser lokti tentet balala den ano senden amentsüla, ta ajungshi.
Maneni Dimapur Municipal Council (DMC) ajanga shishilembaba tesemtem anogo nung khenbosa sanitise asütsü mepishir aser nüburtem akok tashi kilung nung alitsü aser COVID-19 tashidak wara ya süoki ia agitsü ajungshir, ta DNSU ajangasa ashi.