Itasen shitak agütsütsüla; Ita ka indang ki para magitsüla

Dimapur, March 31 (TYO): Linük ajunga shibangba mapang Dimapur nung industry mesüra dokan aser shishilembadak kiburtemi parnok asoshi mapa inyaker ajak nem taa shitak agütsütsüla, ta Dimapur Deputy Commissioner, Anoop Khinchi, IAS-i tanü sangdong ka nung metetdaktsüogo.
Iba ya Home Department, Nagaland State Disaster Management Authority, Kohima-i March 29, 2020 nü tetuyuba agütsüba nung ajemdaker metetdaktsür, ta DC-i ashi.
Linük ajunga shibangba mapang, item mapa inyakertemi (tangalen nungi arurtem dena) para agüja aliba ki kiburtemi parnok dang ita ka para memeshitsüla, ta DC-isa metetdaktsü.
Ano, ki kiburtemi aayangertem aser kaketshirtem dang ki toktsür aotsü tetuyuba agütsüra, parnok (ki kiburtem) Act kübok temerensh alitsü, ta paisa ashi.