RN Ravi-i Aoleang aser Monyü salem abener

Dimapur, March 31 (TYO): Nagaland Governor RN Ravi-i Nagaland nung alirtem aser talisa Konyak aser Phom nunger den Aoleang aser Monyü benjungtem salem metetdaktsüogo.
“Aoleang benjung ya Konyak nungertemi alu junga arohtsü atema temoatsü meshia sarasademba mapang ka lir. Iba benjung mapang pei pei kibong nem mapang bendanga agüja amonger” ta Governor Ravi-i ashi.
Monyü benjung ya Phom nungeri kati ka dang temeim aser akhümtsübu agütsütepba mapang ka lir, ta paisa metetdaktsü.
“Konyak aser Phom nungertemi lokti den tepila yur taküm benjung amongba atema pelar aser iba ajanga tashidak tulu adokdaktsüba virus prokshiba azüoker” ta RN Ravi-isa ashi.
Nübortemi item benjung amongba ajanga Nagaland nung alirtem ajak nem yimjung aser anema aliba takümtem moajang ta Governor-isa ashi.