Nagaland nung jangotsü aser nüngdakba ajak peria lir

Dimapur, April 1 (TYO): Nagaland Home Commissioner aser Principal Secretary, Abhijit Sinha, IAS-i April 1, 2020 nü Law & Order aser Goods & Services indang osang metetdaktsüogo.
Tongtipang nüngdakba goods & services agütsütsü atema Control Room ka lapoka lir aser iba ajanga district 11-i supply yoker. Dimapur dak alaka tanüngba district ajak nung ozüngi melaba dokantem lapokogo. Mokokchung aser Kiphire nung dokantem lapoktsü atema anogo lateta lir, ta paisa ashi.
“Dimapur nung e-commerce agents senzüsenbongba atema tenokdangba agütsüogo. Dimapur District Administration-i community kitchen ka lapoka lir aser NGOs den yaritepa chiyungtsü alemer. Tongtipang nüngdakbatem abentsü atema garitem nem permit agütsür” ta Nagaland Home Commissioner aser Principal Secretary-isa metetdaktsü.
Pai ashiba agi, Nagaland nung ozüng alema inyakba ken o 40 tashi liasü aser item asoshi teinyaktsütem inyakogo.
Tatalokba balala nung nisung 49 tashi apu aser iba atema FIR 29 benokogo. Ajisüaka, senchi kecha machi aser gari ka danga mapu, ta Abhijit Sinha-i metetdaktsü.