Neiba Kronu-i Nagaland nung COVID-19 indang lemsatep

Dimapur, Rongchii/April 02 (TYO): Linük nung coronavirus tashidak wara indang tensa asadangtsü asoshi Ato Kilonser Narendra Modi-i April 2, 2020 nü Chief Minister ajak den Video Conference ajanga senden mena liasü, ta Neiba Kronu-i sangdong ka ajanga ashi.
Iba senden nung Nagaland Chief Minister aden, kong linük ajunga shibangba sentong takok angutsü asoshi maparen kanga junga inyaktsü indang Ato Kilonseri jembi aser iba virus prokshiba nokdangtettsü asoshi temulung melemi aliba nisungtem bushiteta, tangar nungi pilaa ayutsüba aser quarantine maparen atema nenshia jembi.
Kasa senden nung state ajungai nüngdakba medical osettem tekeratiba nung bendentsü indang jembi aser COVID-19 Hospital balaka alitsüba nüngdakba indanga süoka jembia liasü.
Ato Kilonser den iba video conference aliba sülen Nagaland Chief Minister-i state kübok District 11 indang DC/SP aser CMO den Video Conference agia liasü, kong district shia iba COVID-19 tashidak wara nungi kümzüka alitsü asoshi renemshiba indang osang tejangja agitep.
Iba senden nung CMO temi Chief Minister dang mozüki yanglushiba, Medical Equipment tem aliba aser tanga osettsüsettem indang metetdaktsü.
CM-i district ajak nung ketdangsertem dang tensa kanga junga mita alitsü aser tensa azüoktsü asoshi tapet mera agitsü indang ashi.
Krono-isa ashiba agi, maneni April 2, 2020 nü Department of Health & Family Welfare nungi Principal Director, Dr.Vizolie Z Suokhrie-i anir telok kati Mon, Longleng aser Tuensang district tem semdanga COVID-19 quarantine facilities aser mozüki tem semdang. Parnokisa district administration aser district health ketdangsertem den sensaksem kaa liasü.
Nagaland nungi New Delhi nung Nizamuddhin Markaj tamangba yimsü lokti senden nung dener alitsü akok mesüra iba tesem anasai oa alitsü akok ta temulung melemi aliba nisung 48 den tang tashi osang magiteter aser item rongnung par 20 Nagaland nung mali, ta Kronu-isa ashi.
Tanüngba parnok 28 rongnungi nisung ana dang iba senden nung aden aser parnok quarantine facility nung yua lir. Iba nisung ana dak nungi sample agizüka tendangtsü asoshi bener yok aser tena dak coronavirus mali ta bushitet. Tanüngba nisungtem yabo iba lokti adenshiba tesem anasai aoba mesüra iba tesem ajanga aoba dang lir aser parnok ya home quarantine nung lir aser parnok kata dak iba wara indang symptom mali, ta paisa ashi,
April 2, 2020 nü nikongdang 4:00 ako tashinung COVID-19 tashidak wara tendangtsü asoshi sample 40 yokba nungi sample 32 nung iba virus mali, ta osang nguogo aser tanüngba sample ti indang result ataba mapang lir.
Yashi Delhi nungi medical osettem Indian Airlines ajanga Guwahati tashi bener arutsüba Kohima tongogo, ta paisa shia liasü.