Auer sentepba tenlaki

Tanü ya Yisu Yirusalemi takok ngua aiba anogo bilemteta amongba amongnü anogo tajung ka lir. Atangji, Zekaria ainkeri shinba ama, Yihuda nunger chuba, tekümzüker aser ochishir gado chanu nung ajemalua sanger Yirusalemi arur. Asenok aikati chuba ser nung kodaser kor nung masü saka gado nungang mener aru ta bilema alitsüa akok, ajisüaka gado ya akhi mapang Yihuda nunger chuba amenba shiruru ka liasü ta 1 Chuba 1:33 nung kuli ka angur. Iba tapu nung David chubai pa chir Solomon pa melena chuba shimba tamaitsü par jabasoji pa amenba gado nung mendakjang ta shia angutsü. Joko, Yirusalem nung Yihuda nunger alima nung alir ajak adenshia kümtettsü benjong amongtsü renemtepba mapang ka asünungji, Yisu Yirusalemi aiba mapang ya Yirusalem kanga longsua aliba mapang ka liasü. Ano, Pai anogo ishika jakdang Lazar tasü nungi shia arudaktsüba sayatenya mapa ajanga nübortemi Pa dak tali amang aser telok tuluba küma Pa sülen anidak. Yihuda nungertemi Yisu ya akhi ainkertemi shinba amato, shitakba Rome yimli atsüngdoker Yihuda yimten yimli tanaben amenteta Pa chuba akümtsü ta bilema liasü. Atangji, nisung sür tasemnübuba nung shia arudaktsüba nisung jagi alima chubatem atsüngdoker yimsü asütsübaji melamelar liasü. Iba jagi balaka nübortemi Pa dak temulung lemteta aküm südi. Ibayongji, iba anogo nung ya nübortemibo Yisu Yirusalemi aibaji Rome yimli atsüngdoker Yihuda nunger government tasen ka akümi aier ama bilem. Aji oda, Yihuda nunger yimsü nung aliba ama, chuba ajanga süir asünungji nübortemi parnoki abena aliba sü aser süoshi agizüka lenmang nung lemtsü aser asang tu kuzüka amer tepela tulu nung Honsanna, tetezü ‘tang kümzükang’ ta ayimten. Atangji, tanüla nung Yihuda nungertem dang masü saka bendangertem dena kümzüktsü asoshi Pa chuba akümba anogoji ibai liasü. Ajisüaka, shi nungbo alima meimcir temenen nung samar aliba purtem kümzüktsü asoshi Pai Pa taküm temang tenla agütsütsü asoshi renemba anogo liasü. Nisung nük agibo Pa alima nung chuba akümtsü asoshi Yihuda nunger yimtiba Yirusalemi aier ama angu saka Pa nükjidongjibo Yirusalem tenla ki meshitettsü asoshi aoerba liasü. Kodang asenoki Mathi 21:13 nung Yisu Yirusalem tenla ki tonger atalokba otsüji reprangdangdir, asenoki bilemba o Pai bilemba naji tetsüngda talangka liasü ta angatetter. Pa sülen Honsanna ta ayimtena arur nübortem ajak to lia, pai Yisusalen tenla ki menentsüsa tenla ki agi bazaar kümer aliba anema inyakba angur. Tenla kiji shitakba agibo sen agi sen melenertem aliba ki masü saka Tsüngrem den jembiba ki asütsüla. Ajisüaka, Yihuda nungertem asoshibo tenla kidang sarasademtsübaji masü saka tenla kidangi arurtem dang nungi senotsü tajangzük agizüktsü asoshi dang bilema ataa liasü. Ibayongji, Yisui kecha arendaka melii dang, Yirusalem tenka kidang alirtem dangji nenoki Yirusalem tenla ki ya sarasademba ki masü saka auer sentepdak ki (rakzükraktemer leprungki ta masü) ka kümdaktsüogo ta ain aita metetdaktsü. Iba mapang Yihuda nunger yimten lenirtem aser Tsüngrem tenzükertemi anir nisung shingaia pei mapa nung ochishia melitet. Tangar bendanger yimten yimsüsüba kübok alir saka iba kübok alidangjia, Yihuda nunger yimten lenirtemibo Yihuda nungertem dang nungi saruba saru nungia dena miimzüka agitsü dang bilemba auer shisatsü agi sünger liasü. Aji oda, putirtemia tenla kidang shishilembaba nungi tajangzük angutsü bilemba dak alaka Tsüngrem dang sarasademtsübajibo parnok teinyaktsü tongtibang ama mebilem. Parnok tekülemji Tsüngrem den jembiba tekülem masü saka alima rongsen külemba mapangang liasü. Kodang asenoki Yisu Yirusalem tenla ki tonga arur inyakba mapatemji tanü putu nung asenok tenla kitem den medemdanga bilemdangdir, asenok tenlakitem tia o Yisu mapang Yirusalem tenla ki tia naji kecha tepila mali, kasasa, auertem sentepba kiang ka mesüka angutsü. Yihuda nunger amaji asenoka tenüng agibo tamanger saka ajak auertem dang lir. Kopiga asenoka auyali tenla kidang sentepli, ano senshir auyali ta amangtsü ? Joko, asenoka sarasadem tenzükdi, kechiyong Yisui Mathi 17:21 nung ashi ama, asenok dak aliba ochimashi temenenten yabo lumia sarasademba agidang akoktsü.