HCMC Medziphema-i police inyakyim aitsü

Dimapur, Rongchii/April 4 (TYO): CHC Medziphema Senior Medical Officer aser COVID-19, Dimapur district Quarantine Officer Dr. N. Sezo dak Special Task Force personnel temi taochi makai azükba osang angazüka Health Centre Management Committee, CHC Medziphema kanga aoksaba sangdong ka ajanga metetdaktsüogo.
April 3 nü nikongtsütsü Dr. Sezo mapang nungi meyipa aruba mapang Purana Bazzar, Dimapur nung par ki anasa police temi sot. Pai pa maitsü aser mapa jangja ashiba sülena police temi pa dak teka sangshi aser pa indang garia raksatsü.
Iba dak sendakba nung Management Committee-i, iba amala tensa majungba mapang ka nung yakbang nung inyakertem kanga nüngdaka aliba mapang police tem inyaksangshi ashishiogo. Aibelena aliba police tem inyaksangshi ya police; P – polite, O – obedience, L – loyal, I – intelligence, C – courageous and E – efficient tamendakdak den meputep aser iba inyakyim ajanga police force ajunga nem maksü bener arutsüogo.
Nüburtem ajangzüktsü mechi CHC Medziphema nung pa kanga nüngdaka liaka onoki pa Dimapur nung lia COVID-19 anema raraba nung bendanga agüja inyaktsü asoshi temelaba agütsüogo. Committee-i ketdangsertem dang iba ken o süokia agitsü aser tangsa tang tapet jenjang agitsü mepeshir, ajita asünungdang tarutsü nung iba amala inyakyim tanaben benoka minyaktsü, ta Health Centre Management Committee, CHC Medziphema-i sangdong ka ajanga metetdaktsü.