Dmr nung colony/yimtsüng nung dang dokantem lapoktsü

Dimapur, April 4 (TYO): April 6, 2020 nungi Dimapur nung pharmacy, petrol pumps, media house, tongtipang nüngdakbatem aser aonsotsü ayokba dokantem dang lapokdaktsütsü, ta Dimapur Deputy Commissioner, Anoop Khinchi, IAS-i tanü metetdaktsü.
Ozüngi melaba dokantemji anepdang 9:00 ako nungi nikongtsütsü 2:00 ako tashi dang lapoktsü aser wholesale markets anepdang 3:00 nungi anepdang 8:00 tashi dang lapoktsü, ta Dimapur Deputy Commissioner-isa ashi.
Aonsotsü ayokertemji main market nung masü saka colony/yimtsüngtem nung dang ayoktsü melatsü aser New Market khenyongi melapoktsü. Anungji, nisungtemi pei pei colony/yimtsüngtem nung dang alitsü metetdaktsür, ta paisa ashi.
State ajunga shibanga lir anungji tongtipang nüngdaktem shishii aoba dak alaka public senzüsenbongba noktanger. Ozüngi melaba dokantem nung nisung o nisung tsüngda tepila ayutsüla, ta Anoop Khinchi-isa metetdaktsü.
Ozüng alema inyakertem Disaster Management Act 2005 nung Arrla 51 nungi 60 aser IPC kübok Arrla 188 kübok temerenshi alitsü, ta paisa nenshia ashi.