Shimo milen tsüklokba dang nungibo sarasadem tashi tuluba

Dimapur, April 4 (TYO): Prime Minister Narendra Modi-i April 5, 2020 (Deobar) aonung 9:00 ako nung linük nung alirtemi minute 9 atema shimo milen mesüra diya tsükloktsü mesüra torchlights/mobile lights ayatsü ayongzüka lir, saka iba dang nungi Khristantem atemabo sarasadem tashi tulutiba ta Dimapur Ao Baptist Arogo (DABA)-i tayongzükba ka agütsüogo.
“Temeim amangbapurtem, COVID-19 tashidak den raraba nung asenok ajaki tashi angaa shilem tajung agiba ngua kanga pelaba lemsateper, aser ano tashitak nungi kümzüka alitsü asoshibo tim lemangtem ajak nung lennir tesayubatem dang tashi angatsü maneni ayongzüker” ta DABA Pastor, Rev. I. Wati-i sangdong ka nung metetdaktsü.
“Linük lennir PM Modi-i Deobar aonung 9:00 ako nung pei ki kikümdong mesüra kilem kolak nung nokdaker shimo milen mesüra mobile torch minute 9 tsükloktsü sangdongogo. Asenoki par sobaliba aser yimsüjia akhümtsübur, ajisüaka tashidak nungi kümzüktsü atemabo, item inyakyim dang nungjagi Tsüngrem dang asen tamang sarasademji tashi tuluba ta asenok Khrista dak amangbapurtemibo metet” ta Rev. I Wati-isa ashi.
Asen linük lenniri ayongzükba mapang nung, kasa nükjidong asoshiji, asenok kibongtem ajak nung pei ki telong nungi COVID-19 tashidak nungi asen linük nem taneptsü agüjang ta sarasademtsü ayongzüker. Sarasadem agi asenoki melakli, Tsüngremi iba sarasadem angashitsü aser pai asenok aneptsütsü, ta DABA Pastor-isa ayongzük.