SRDF 2020-21 kübok Nagaland nem Rs 20.5 crore agütsü

Kohima, April 4 (TYO): Ministry of Home Affairs (Disaster Management Division)-i financial year 2020-21 atema Nagaland nem Rs 20.50 crore agütsüogo.
Iba ya State Disaster Response and Mitigation Fund (SDRMF) ama agütsüba lir.
Ministry-i latettsüba ama Rs 20.50 crore nungi 25% ji tang Corona virus tebilemtsü atema amshitsü, ta OSD Nagaland State Disaster Management Authority (NSDMA), Johnny Raungmei-i osangbener dang ashi.
District Disaster Management Authority (DDMA) nem Rs 55 lakh lemzüktsüogo aser ibaji DDMA shia nem sen lakh 5 agütsüba lir. Iba ya anogoshi aayangertem aser quarantine centres o hostels nung nüngdakbapurtem yaritsü atema lir, ta Johnny Raungmei-isa shisem.
Centre nungi sen marudang yongi NSDMA-i COVID-19 anema raratsü atema DDMA tem nem sen lakh 31 agütsür liasü. NSDMA-isa DDMA ajak nem sen crore 4.94 alang jang quintals 35,000 bener yokogo aser iba ya district shia nung anogoshi aayangertem atema lir, ta paisa metetdaktsü.
Maneni, Health and Family Welfare department nem medical equipments alitsü atema sen lakh 28 agütsü, ta Raungmei-isa ashi.
Kohima Lotha Hoho Ki nung State Emergency Operation Centre (SEOC) nung ketdangser aser staff 39-i COVID-19 dak sendakba osangtsüsang metetpeladar. Maneni district shia nung DDMA-ia mapa inyakdar, ta paisa ashi.
NSDMA-i COVID-19 indang IEC materials oshi balala nung meyipzükogo aser Nagaland State Rural Livelihood Mission indang SHGs ajanga April 3 tashi nung yimtsüng 1207 nung lemogo, ta Johnny Raungmei-isa metetdaktsü.
Rongdak teyari nüngdakra COVID-19 control room numbers 0370-2291122, 0370-2291120 aser toll free number 1070 nung osang sangoktsütsü akok, ta paisa shisem.