Dimapur nung police-i doctor ka züka merenshi; Telok aikati aitsür

Dimapur, April 4 (TYO): Hokolbar aonung Dimapur kübok Purana Bazar nung police-i Dr Nesozol Sezo züka merenshi.
Pa mapa nungi kidangi aodang, par ki anasa police-i pa dak teka sangshi aser pa indang gari-a raksatsü, ta Dr Sezo-i ashi.
Dr Sezo ya Medziphema primary health centre nung senior medical officer lir aser pai Honibarnü Dimapur Deputy Commissioner tsüngdang ken o ka benok.
Yasüng 11:30 ako meta pa Dimapur district hospital nung mapa tembanger kidangi aodang DHB petrol pump anasa police telok kati pa anendaktsü, ta Dr Sezo-i Dimapur DC tsüngdangba benokba ken o nung shia lir.
Pa ya Hokolbar anepdang 6:30 ako meta mapa inyaktsü atema ao aser anogo piyong kanga mazüngi belemer kidangi meyipa aodang iba lendong atalok, ta Dr Sezo-isa ashi.
COVID-19 wara atema pa ya district hospital nung mapa lemzüka inyaker aser pai gari telung nung mask meinokba atema police-i pa züka merenshi aser gari den-a raksatsü, ta paisa shisem.
Pai police dang pa indang identity card aser gari nung enoka aliba sticker sayu saka police-i pa dak teka sangshi, ta Dr Sezo-i metetdaktsü.
Dr Sezo ya Dimapur nung quarantine officers rongnung ka lir aser iba dak sendakba mapa inyaker.
Honibarnü Nagaland Director-General of Police, T. John Longkumer-i Dr Sezo aser medical wadang nung inyaker ajak dang tatok meshiogo.
“Hokolbar aonung police telok kati Dr Sezo dak inyakba mapa atema kanga sasaa bilemer aser iba tatalokba atema bushisüngdang asütsü” ta DGP T. John Longkumer-i ashi.
“Medical wadang nung inyaker ajak dang ni tatok meshir aser aremzüktsü mepishir” ta paisa shisem.
“Iba tatalokba atema bushisüngdang ka tenzükogo aser aibelenerte, merenshitsü” ta Nagaland DGP-isa metetdaktsü.
Honibarnü telok aikati iba tatalokba aitsüogo.
Dimapur Naga Students’ Union (DNSU), Health Centre Management Committee, Community Health Centre Medziphema, Dimapur District Citizens’ Forum (DDCF), Naga Peoples Front (NPF), Ao Senso Telongjem Dimapur (ASTD), Tenyimi Youth Organization Dimapur (TYOD), Chakhro Southern Angami Union Dimapur (CSAUD) aser Naga Students’ Federation (NSF)-i sangdong balala nung aitsüba metetdaktsü.
DNSU-i ashiba agi, “Special Task Force nungi police-i doctor dang masüngdangtsü aika asüngdang aser mask meinokba nung ammeter kanga mejungi azük. Police-isa pa indang gari raksatsü.”
Hokolbar anogo nungsa police-i shiranger ka dak azük, ta DNSU-i ashi.
Satish Sarkar ya tesayur ka lir aser pa mozü kidangi aodang police-i pa dak züka aser o tamajung shia merenshi, ta DNSU sangdong nung shia lir.
DNSU-i ketdangsertem dang tarutsü nung iba ama mataloktsü atema aibelenba police tem tatishitsü keta merenshitsü atema takhangba agütsü.
Health Centre Management Committee, Medziphema-ia tang ama tensa ka nung police-i doctor ka dak tesempatsü mapa inyakba aitsüogo.
“Tang ya nisung ka indang tashi sayuba mapang ka masü saka longjemer alima wara anema raratsü mapang ka lir” ta Dimapur District Citizens’ Forum (DDCF)-ia sangdong ka nung ashi.
“Security personnel amaji doctor, nurse aser tanga medical staff temjia kanga tongtipang lir. Parnok ya COVID19 anema raraba nung tongti shilem agirtem lir anungji aibelena inyakba police tem merenshitsüla” ta DDCF-isa metetdaktsü.
Maneni, Naga Peoples Front (NPF), Ao Senso Telongjem Dimapur (ASTD), Tenyimi Youth Organization Dimapur (TYOD), Chakhro Southern Angami Union Dimapur (CSAUD) aser Naga Students’ Federation (NSF) teloktemi iba tatalokba khukhua aitsüba den aibelenertem ozüng tapet agi merenshitsü takhangbatem agütsüogo.