TYOD aser CSAUD nati khukhua aitsür

Dimapur, Rongchii/April 04, 2020 (TYO): Purana Bazar nung April 03, 2020 aonung 11:00 meta Senior Medical Officer (SMO) Medziphema, Dimapur District, Dr. Sezo dak Special Task Force police-i pa dak kanga mejungi azükba osang angashia Tenyimi Youth Organization Dimapur (TYOD)-i jashiba osang lemsatepogo.
COVID-19 den raratsü mechi police department-i alakteta bendanga agüja tenzükba ngua pelaba metetdaktsüba mapang, lokti tenzüktsü asoshi tenüng amer police kari tashiyim amshia aser taochi mesayui iba amala mapa inyakba angudang kanga dang jashir, ta TYOD-i ashi.
TYOD-i, tim department ajanga Doctor indang gari den külemi pa temang tajungba maküm tashi mozütem alitsü asoshi teyari ajak agütsütsüla, aji asü nungang iba ama tensa ka nung pai kecha timtem melii mapa inyaktettsü, ta takhangba agütsüogo.
Dr.Sezo tekaratiba nung taneptsü angutsü asoshi TYOD-isa sarasademtsüba shisem.
Maneni, Dr. Sezo dak Special Task Force Police-i azükba osang angazüka, Chakhro Southern Angami Union Dimapur (CSAUD)-ia aoksaba aser jashiba osang lemsatepogo.
CSAUD-i state sorkar marendaki aibelener STF police tem mapa nungi anendaktsütsü asoshi takhangba agütsü.