Dimapur nungi nisung ka Tabliq Jammat nung aden: MCD

Dimapur, April 5 (TYO): March 7 & 8, 2020 anogotem Nizamuddin nung Tabliq Jammat (Preaching Group) sentong nung Dimapur nungi nisung ka dang oa aden aser pa March 12 nü Dimapur tonga aru, ta Muslim Council Dimapur (MCD)-i Deobarnü metetdaktsüogo.
Iba nisung aruba osang angazükba sülen pa bushiteper Medical ketdangsertem nem agütsü. Iba sülen par kibongjia quarantine nung ayu aser parnok ajak Covid-19 ‘negative’ ta putetogo, ta MCD Working President, A Rahman-i ashi.
Maneni, Dimapur kübok New Market nungi nisung ana Delhi/ Nizamuddin nung shishilembatsü atema ao aser tenajia MCD-i jangjaba sülen Quarantine nungayu aser tenaprong dak Covid-19 ‘negative’ ta putetogo, ta paisa ashi.
Old Showuba Village Council, Dimapur nung Chairman-i züluba shidi ka social media nung prokshir aser iba nung nisung 10 Guwahati nung tamangba yimsü dak sendakba sentong ka nung adenba aser Home Quarantine asüba indang shia lir, ta MCD-isa sangdong nung ashi.
MCD-i ketdangsertem dang nisung tenüngtem meprokshitsü saka bangdakpur ket nung agütsütsü atema mepishir, ta A Rahman-i ashi.
Iba telok ya February 10 nungi tenzüker anogo 40 tashi Guwahati kübok Narangi nung Tabliq Jammat sentong nung aden aser parnok March 21 nü Dimapur-i meyipa aru. Parnok ya Railway Station nung temang tendang aser idak nungjagi pei pei yimtsüngi ao, ta paisa metetdaktsü.
Tabliq/ Nizamuddin onük ajanga Dimapur nung Muslim nunger dena sensotemi tebilemtsü abener saka iba ajanga asenoki lokti ka alakteta mesempatsüla, ta MCD-isa metetdaktsü.
Nagaland nung Tabliq Jammat züngsemtem kari tesüiba ita ka tsüngda Nizamuddin nung mesüra tanga tamangba yimsü dak sendakba sentongtem nung dena lira, pei sasa tenüng agütsütsü mepishia metetdaktsür, ta MCD-isa ashi.
Asenoki meimchir kümzüktsü atema COVID- 19 anema külemi longjemer raradi, ta MCD-i ayongzük