Nagaland nung kobi melii COVID-19 tendangtettsü: RN Ravi

Dimapur, April 5 (TYO): Nagaland nung COVID-19 testing laboratory ka yanglutsü atema sorkari mapa inyakdar, ta Governor RN Ravi-i ashi.
“Iba ya yakta lapoka mapa inyaka aotsü imlar. Nagaland nung testing lab maliba ajanga COVID-19 indang osang jungjunga masadangteter” ta RN Ravi-i ashi.
“Iba lab yanglutsü atema ni Union ministry of Health aser Indian Council of Medical Research den osang agitepdar. State sorkari COVID-19 virus prokshiba azüoktsü atema akokba mapa ajak inyaka arudar” ta paisa shisem.
“Tia maka COVID-19 aketer putet nunga state sorkari ibaji anepalutsü atema jungjunga renema lir” ta Ravi-isa ashi.
Paisa, COVID-19 anema inyaker health personnel, police aser NGOs ajak nem tenüngsang agütsü.
Nagaland Health & Family Welfare Minister Pangnyu Phom-ia tawa tu Union health minister Harsh Vardhan dang Nagaland nung COVID-19 indang sample tendangtsü atema laboratory ka lapoktsü ayongzüka liasü.
Pangnyu Phom-i Union Health Minister dang tekaratiba nung Naga Hospital Authority, Kohima nung laboratory ji lapoktsü atema mepishi.