Nagaland NPP-i chiyongtsü lema agütsü

Dimapur, Rongchii/April 06, 2020 (TYO): COVID-19 wara azüoktsü mechi linük tesem ajaklen maparen aser sentong balala shibangtsür aliba mapang, meimchir dang temeim mapa sayuba shilem ka ama, NPP Nagaland State, President, Dr. Andrew Ahoto Sema-i anir State Executive Members aser Youth Wing züngsemtemi, Niuland temeküt aser telungtet nung alir Eastern Naga kaketshir 600 nem chiyongtsü lema agütsütsü asoshi April 6, 2020 (Hombar) nü charity sentong ka ayongzüka agiogo, ta sangdong ajanga metetdaktsü.
Deputy Commisioner indang Office nung District Administration ketdangser matsüngdang item chiyongtsü ya Dimapur Eastern Naga Students’ Union, President, Bendang nem agüja liasü.
Tang atalokba tensa ajanga nüngdakba chiyongtsü tem peria menguteti/maliteti timtema alir nübur dang chichiba Khristan ka ama tanela nung temeim aser aria bilemtsüba mulungsentsü sayutsü nükjidong nung iba charity sentong ayongzükja liasü, ta kasa sangdong ajanga metetdaktsü.