Naga Hoho-i April 3 tatalokba aitsür

Dimapur, April 6 (TYO): Alima nung Novel Corona Virus wara ajanga linük aika shibangtsüsa tensa ka ajurua lir aser Nagaland nunga kasa tenokdangba agüja lir. Ajisüaka, Tsüngrem taochi ajanga Nagaland nungbo COVID-19 aketer ka dang puteta mali, ta Naga Hoho (NH)-i tanü sangdong ka nung ashi.
Nagaland state nung iba virus prokshiba azüoktsü atema Medical department, District Administration, Disaster Management, Police aser tangartemi kanga meranga inyaka arudar aser iba mapa tajung atema tenüngsang agütsür, ta NH-isa metetdaktsü.
Ajisüaka, police kari mebilemdangi mapa inyakba aser public nem timtem agütsüba osangtem angashiba atema sasa bilemer. April 3, 2020 aonung Senior Medical Officer Dr. Nosezol Sezo dak teka sangshiba aitsür aser shibangba tenüng amer doctor ka dak teka sangshiba ya khenyongi magizüker, ta NH Tongti Tezülur, K. Elu Ndang-i ashi.
Ozüng amertemi tenokdangba kübok madenertem aser medical teyari nüngdakba shirangertem angatettsüla. Anungji, tashiyim mapa inyakba police tem ozüng tapet agi merenshitsüla, ta Naga Hoho-isa ashi.
Parnokisa public dang COVID-19 anema raratsü atema kidang dang amongtsü atema mepishia metetdaktsü.