COVID-19 atema Ex-Servicemen temia pei shilem agir

Kohima, Rongchii/April 07, 2020 (TYO): Linük nung Coronavirus (COVID-19) wara den maneni raraba mapang ka nung Army, Navy aser Air Force nungi Ex-Servicemen (ESM) temi kanga dang mulungsoa nübu agi civil administration nem teyari balala agütsüdar, ta PRO (Defence) sangdong ka ajanga Lt Col Sumit K Sharma-i metetdakja liasü.
Iba mapatong dak sendakba inyakyim ya Department of Ex-Servicemen Welfare (DESW), Ministry of Defence (MoD) ajanga achaayanger. Item Veteran ya Kendriya Sainik Board, state level nung Rajya Sainik Boards 32 aser linük tesem ajunga nung Zila Sainik Board 403 ajanga tongteprateper.
*Karnataka
Brig Ravi Munniswamy (Retd), shibai Karnataka achaayangdar, Bengaluru nung pa lenisüba kübok veteran bicycle rider 45 densema aliba team-i WhatsApp group ka ajanga tongtepratepa yimti nung tantsür/tambur aser temang nung tashimaiter nem nüngdakba osettsüset den küelmi mozütem lema agütsüdar. Parnok dak alia, Dharwad nung Ex-Servicemen volunteers, Davanagere, Shivamogga, Hassan, Mysuru aser Kodagu nungeria timtema alirtem nem chiyongtsü lema agütsüba nung yarisemdar.
*Andhra Pradesh
Ex-Servicemen volunteer parnok nisung 300 junga agi Andhra Pradesh nung State Police yaridar. Mangalagiri nung Ex-Servicemen tentettem talisa Tadepalligudem, West Godavari district tentet aser 28 Air Defence Regiment ESM tentet temi sensakertem nem nüngdakba osettsüset aser chiyongtsü tem lema agutsüdar. Shri Chaitanya ESM Association, Bheemunipatnam ajanga lockdowm maparen asadangtsü asoshi yimti nung police den teka amteper inyakdar.
*Uttar Pradesh
Brig Ravi (Retd)-i ashiba agi, Uttar Pradesh indang district 75 nung ESM team ka den Zila Sainik Boards longjemer senior veteran ESM tem yariba dak alia, nüngdakbapur nem jang-o-tzü lema agütsüdar aser nüburtem libaliru mitdar. State nung Army Medical Corps nungi ESM 6,592 den tongtepratepa inyakyim metetdaktsüogo aser nüngdak adokdang parnoki yariteptsü atema renema lir.
*Punjab
Rajya Sainik Board, Punjab, Director, Brig Satinder Singh (Retd)-i ashiba agi, Ex-Servicemen 4, 200 shi ‘Guardians of Governance’ ama yokogo aser tang parnok ya Punjab kübok yimtsüng ajak nungi data bendena aser nüburtem libaliru mittsü.
*Chhattisgarh
Air Cmde A N Kulkarni, VSM (Retd), shiba Chhattisgarh nung tensa tem asadangdar, pai ashiba agi, Bilaspur, Janjgir aser Korba nung State Police nem teyari agütsütsü asoshi tang tashi nung ESM ishika dang yoka lir.
*North-East
Assam kübok district 19 nung teyari balala agütsütsü asoshi Brig Narain Dutt Joshi, SM (Retd)-i ESM volunteer 300 anidena lir. Kasa mapang, Shillong nung civil administration yaritsü atema Col Gautam Kumar Rai (Retd) lenisüba kübok volunteer 79 renema lir. Tripura nungi Brig JP Tiwari (Retd)-i ashiba agi, ESM volunteer indang list ya State aser district administration den lemsatepogo aser nüngdak adokdang parnok nem lemzüktsüba mapa mashi nung yariteptsü asoshi renema lir.
*Jharkhand, Haryana, Uttarakhand
India nung tanga state balala nung ESM-i inyakba ama, Jharkhand nungi Brig Pathak (Retd), Haryana nungi Col Rahul Yadav (Retd) aser Uttarakhand nungi Brig KB Chand (Retd) nungeria pei pei state nung maparen takok ngua inyakdar.
Maneni, tang atalokba tensa (COVID-19 wara prokshiba) ajanga India ajunga shibanger aliba mapang, Army, Navy aser Air Force mapa nungi anisüngzüka alir sepaitem den külemi Ex-Servicemen tentet balalai nübur aria bilemja mapang tajung inyaktsüba ya tenüngsang agütsü langa lir, ta Sharma-isa metetdaktsü.