Dimapur DC aser CP-i metetdaktsür

Dimapur, April 7 (TYO): Dimapur Deputy Commissioner, Anoop Kinchi IAS-i public dang nüngdak makaba nung kimai malutsü atema mepishia metetdaktsüogo.
Rongdak nüngdak adokba mapang public-i anepdang 9:00 ako nungi nikongtsütsü 2:00 ako tsüngda pei pei colony nung shishilembatsü metetdaktsür. Iba mapang public-i tangar den tepila ayutsü nenshir, ta Anoop Kinchi-isa ashi.
Dimapur nung Fair Price Shops ajak April 6, 2020 nungi anepdang 7:00 ako nungi nikongtsütsü 4:00 ako tashi lapoker, ta paisa metetdaktsü.
Iba dak sendakba nung Dimapur DC-i ADS, Food & Civil Supplies, Dimapur dangi züluba shidi ka nung FPS nung nisungtem metre kabosa pilar noktaktsütsü atema shia lir.
Külen, Commissioner Police Dimapur Rothihu Tetseo-ia public dang main road/ national highway nung mesenzütsü atema mepishia metetdaktsüogo.
Dimapur kübok main town aser Highway nung Section 144 Cr PC ozüng magien lir aser iba nung temelaba malir shinga mesenzüdaktsütsü, ta Rothihu Tetseo-i nenshia ashi.
CP Dimapur-isa gari senzütsü atema permit alirtem dang official nüngdak dak alaka tanga mapa atema mesenzütsü mepishia metetdaktsüogo.
Dimapur main town nung permit maliba garitem ajak aputsü, ta paisa shisem.