Nagaland nung COVID-19 sample test lab 2 lapoktsü ariteper

April 7, 2020 nü H&FW Department IDSP Hall nung ketdangsertemi osangbener dang COVID-19 indang osang metetdaktsüdang agiba noksa angur.

Kohima, April 7 (TYO): Nagaland nung COVID-19 samples tendangtsü atema state sorkari bio-safety laboratory ana lapoktsü atema kanga merangdar, ta tanü Health and Family Welfare Department-i metetdaktsü.
“Sorkar aser department-i Kohima aser Dimapur nung bio-safety lab ka ka lapoktsü atema kanga merangteper” ta H&FW Secretary, Kesonyu Yhome-i tanü osangbener dang ashi.
Naga Hospital Authority Kohima (NHAK) nung Bio-safety lab level-3 aser Referral Hospital, Dimapur nung level-2 lab lapoktsü, ta pai ashi.
Laboratory ana lapoktsü atema state level committee nung mendenbubaji Yhome lir aser pai ashiba agi nüngdakba maparen ajak tembangogo aser tang osettsüsettem benedener.
Tang ya Nagaland nungi COVID-19 sample tem Assam kübok Dibrugarh aser Guwahati aser Manipur kübok Imphal-i yoker.
Tanü tashi nung sample 61 tendangtsü atema bener yokogo aser item nungi 48 ‘negative’ ta osang aruogo aser sample 13 indang osang ano mangu lir.
“Biological safety lab ka lapoktsübaji Indian Council of Medical Research (ICMR)-i mulunga agizüktsüla aser iba atema state sorkari ICMR den osang tongtepdar” ta Yhome-isa ashi.
“Iba dak sendakba nung Governor aser Chief Minister office temia shilem agir aser lab nung nüngdakba osettsüset bener arutsü atema inyaktepdar” ta paisa shisem.
Department-i lab nung inyaktsüpur mongintem shima lir aser ano training agitsü atema nisungtem yoktsü, ta Principal Secretary Menukhol John-ia ashi.
“School tem lapoktsüba aser shibangba agientsüba atema sorkari ano telemtetba kecha magi lir. Ajisüaka, shibangba ya lapokra quarantine atema amshiba school aser tanga tesemtem department-i mozü agi merüktettsü renema lir” ta paisa metetdaktsü.
Nagaland nung testing facility maliba ajanga COVID-19 tendangertem kanga ajem asü ta osangbenertemi asüngdangdang “Nagaland nungi COVID-19 test ta jangjartem dang yoker aser tanü tashi nung sample 60 tashi tendangtsü atema yokogo” ta Principal Director, Dr Vizolie Z Suokhrie-i langzü.
Nagaland nungi tendangtsü atema yokba sample ji ghonda 6-7 tashi agir aser iba jagi negative ta puteter asü ta nisungtemi tsübua bilemer. Iba atema Dr Suokhrie-i ashiba agi “sample ji minus temperature kübok viral transport medium ka ajanga bener yoker aser iba jagi virus masür.”