NE nüburtem kümzüka ayutsüla: Naga Hoho

Dimapur, Rongchii/April 09 (TYO): Alima ajunga nung COVID-19 tashidak wara den raraba mapang India tesem balala nung Northeast region nungi oa aliba nüburtem tereprangsü, sentsüsempong aser kin dak ajemdaker züka merenshiba aser mezüngmeshiba osangtem angashir, ta Naha Hoho sangdong ka ajanga ashi.
Iba ama timtem balala tesem aika nung ajangshiba angashir aser yamaji mangashiba aser memetetba timtema ajurur, aser nisung aika ola madoki tim atemer.
Manipur nungi tetsür ana, Delhi nung ka aser Mumbai nung ka dak bike nung mena alirtemi metzü metsüloktsü. Tenaprong dang ‘Corona’ ta aja. Ahmedabad nung Nagaland nungi tetsür teku tashi tashiyim agi anir oa coronavirus tashidak tendang aser kimai maludaktsüi kilung nung shibanga ayu (quarantine). Mysore aser Hyderabad nung kaketshir kar nüngdakba osettsüset alitsü asoshi grocery stores telungi maitdaktsü. Kolkata nung Sikkim nungi arishi küm 24 tain temang manemi alir ka mozüki anati maitdaktsü aser mapang tatsüka lir police temi jaoka COVID-19 tashidak keta alitsü südi ta temolung melemi alirtem den külemi Isolation ward nung shibanga ayu.
Tereprangsü, sentsüsempong aser kin dak ajemdaker merenshia/mezüngmeshia amshiba ya tang tasen masü, saka tashidak wara ka den kin ka sendakteptsüba ya tim masü.
Anungji Northeast state tem nungi Chief Minister aser MP temi India Ato Kilonser den ajurutepa iba tebilemtsü ya lemsateptsüla aser Northeast nungi yimti balala nung oa aliba nüburtem kümzüka ayutsü asoshi state ajaki kanga saksalema inyaktsü aser iba den külemi police aser nüburtem nem angatetdaktsütsü asoshi totuyuba agütsütsüla, ta Naga Hoho general secretary K. Elu Ndang-i sangdong ka ajanga ashi.
International Convention on the Elimination of All Forms of Racial Discrimination nung India-ia meyongnem agüja lir, aser akhi mapang nungi kin telemsa aser kin anema mezüngmeshia mapa tamajung inyakba asoshi tang yabo temzüng ozüng takhang yanglur alitsüla, ta Naga Hoho sangdong ajangasa ashi.
India nungia süang mesüra India nungera tesü, linük nung shinga kin/tereprangtsü mechi timtem majurudaktsütsüla, ta Naga Hoho sangdong ajangasa ashi.