COVID-19: Nagaland nung coronavirus puteta mali

Dimapur, Rongchii/April 09 (TYO): Nagaland Chief Minister, Neiphiu Rio-i April 9, 2020 nü senden ka nung state nung COVID-19 dak sendakba aser state nung Health department renemshiba indang asadanga liasü. Iba senden nung Minister, Advisor aser ketdangsertem dena liasü.
Sangdong ka ajanga ashiba agi, April 9, 2020 nikongdang 5:00 ako tashinung Nagaland nungi coronavirus tashidak alitsü südi ta temulung melemi sample 69 tendangtsü yokba nungi sample 65 nguogo aser parnok ajak negative (meputet) aser tanüngba sample 4 result anu mangu.
Sangdong ajangasa ashiba agi, Dimapur-i commercial flight aru tenzükba sülen Nagaland-i arutsü sentong alir ajak dang khen atema state-i arutsüba sentongtem thinena atatsü sorkari metetdaktsüogo.
Sorkar sangdong ajanga ashiba agi, mepaidoktetba maparen kar ajanga Nagaland-i arutsüsa aküm ka asünunga Dimapur Airport nung atongba den külemi medical ketdangsertemi temang tendangtsü aser iba sülen Nagaland sorkari Dimapur nung shimteta aliba institutional quarantine centres nung oa tajemba agia anogo 14 quarantine asütsü. Iba den külemi osang mesangdong tashi state arrtsü ajunga maneni shibanga atatsü.
Maneni April 03, 2020 aonung Civil Hospital, Dimapur nung Orthopedic Surgeon, Dr, Nosezol Sezo kidangi shilangba mapang tesem ajunga shibanga aliba mapa inyakba police duty nung alirtemi züka merenshiba aser pa indang gari raksatsüba ken o dak sendakba nung Additional Deputy Commissioner, Nuiland ajanga Magisterial Inquiry ka agitsü asoshi state sorkari totuyuba agütsüogo, ta kasa sangdong ajanga ashi.
Inquiry Officer dang temonutiba agi April 18, 2020 tashinung bushisüngdangba report agütsütsü shiogo, ta ashi.
State nung jang-o-tzü, mozü, POL aser tanga nüngdakba osettsüset akhi ama peria lir, ta sangdong ajangasa ashi aser state nung tenokdangba agüja aliba nung nüburtemi tashi angaa anidakba asoshi pelaba metetdaktsü.