Shibai lungpakji longdoktsütsü ?

Yisu sür tasemnep Yisu meimer tetsürtem rongnung Mari Magdalin, Yakob tetsü Mari aser Salome nungertem Yisu leperi anepdang anü adokli yakta oa atongba otsü asenoki angur. Iba mapang tashi nung ya parnoki Yisu shia arutsü tabo bilema mali asü. Yakanü to Yisü sür külen Arimathia nunger Yosef-i Pilate dang nungi Yisu tasümang meshizüka bener oa aritepa rema yutsüba to serbo shingaia Pa temang reprangtsü mekoki liasü, kechiyong leperji Rome sepaitemi anük aser tetsürtemji kar dak alaka Yisu sülen anidaker teburtembo ajak tetsübu nung liasü. Iba ama terata aser tetsübu mapang ka nung, tetsürtem parnok asem pezükaji amongnü anepdang yaktaji Yisu tasümang nung teronem menemba totzü mezütsütsü asoshi apuso. Tensa tamajung nunga Yisu meimba agi tetsübu samadaktsüba kuliji ibai ka lir. Ajisüaka, item tetsürtem mulungjang nung shisabulu tuluka liasü, ibaji Yisu leperji lungpak tuluka agi nembanga liasü. Ibaji tetsür tanurtemibo longdoktetla masü kanga tulu aser taret liasü, anungji ibaji ‘shibai longdoktsütsü’ ta parnok rongnung shisabolua jembitepa aoba asenoki Mark 16:3 nung shia angur. Ajisüaka, parnok asoshi tepelatsü kaji parnok oagi leper atongdangbo lungpak tulukaji lungdokadoker leperji lapoka liasü. Iba tashi nungjia parnoki Yisu shia arutsü tabo mamang, anungji kanga süngmang aser tetsübua tsübua alidang kotak tenyar kati parnok dang Yisu shia aruba osang sangoktsüba asenoki kasa tapu nung shia angur. Yisu shia aruba anepdang Yisu temang nung totzü mezütsütsü asoshi aoer tetsürtemji mesüka asenoki aiben Yisu shia aruba tashi dak mamanger. Yisu taküm alidanga, kenü anogo Pai suwar kümdaktsüba tanüla agi timtemdaktsüba tanur ka aneptsüba mapang, iba tanubusang tebu jagia Yisu dang ” nai ni mamangba asoshi yariangma,” ta Mark 9:22 nung shia angur. Ni mamangba asoshi yariang ta ashiba tetezüji, ni ozü tanur ya nai jungtsütsü tabo mamangtet liasü, kü dang taidokang ta ashirba liasü. Asenoki Yisu nungibo imlar saka mamangtetter, iba jagi sarasademer saka asenoki asüngdangbaji ataloktsü ta mamanger. Ajisüaka, Yisui asenoki Pa dak mamangtetba tashimaitji meteta lir, anungji Pai teti asenoki lenjii arur aser tashi itshidaktsür. Yisu shia aruba tashi nung asenoki mamangtetba ajanga aiben asenoki, asenoki abenba khurettem makoktsü amai shisabolur. Yisu shia aruba anepdang Pa leperi aoer tetsürtem asoshia Yisu leper küpbangba lungpak meküptoktsübaji shisabolu khuret tuluka liasü. Ajisüaka, parnok tonga maodangyongi parnoki shisabolua bilemba lungpak tulu taretji Yisu shia aruba tashi agi longdokadoker liasü. Iba kasaji tanüa asenoki asen taküm nung asensasabo makoktsü amai bilema aliba khurettemji Yisu shia aruba tashi agibo akoktsü ta asenoki amangdi. Asenoki Yisu dak amangba otsü ya shia aruba otsü lir. Yisu shia maru asübo tasü tsüngrem ka külemtsübo kecha nüngdak madokla. Shia aruba tetezü tasü madak takok anguba aser tamakok angur amai atalokdang tashi itshir nokdaktetba taküm lir. Ibaji asenok tamangba yimsü aser tesayuba lir. Iba tesayuba nung amangba agi tamangertem ta asenok dang ajar. Alima nung alir asünungji, asenoka Yisu den anogo shia jajaaka, asenoki makoktsü amai bilemba shisabolu aika alitsü. Item shisabolu khurettemji, ashiko, kibong nung tanurtemi tashi mangaba asütsüa akok, tsüraburtemi tsürabur memesük aliba khuret asütsüa akok mesüra apuani tsüngda ochishia melitetba khuret asütsüa akok, temang nung taneptsü aginüba khuret asütsüa akok mesüra sentsü agi nembanger aliba shisabolu khuret asütsüa akok, kechi khuret südir süang, item khuretji Yisu shia aruba tashi agibo akoktsü. Yisu leper küpbangba long pasasa longdokadoker liasüba ama, kodang asenoki Yisu shia aruba tashi dak amanga inyakdir, asenoki makoktsü ta bilemba shisabolu khurettemji Yisu shia aruba tashiji metizükteti pasasa oadoker alitsü. Iba tashi aser ainji Yisui asenok nem agütsür tebu dangi ogo. Iba tashi aser ainji amshia, Luke 19:13 nung shia aliba ama, Pa tanaben maru tashi Pai nungloktsüba mapatem shitak inyaka atatsübajiang Pai nungloktsüba mapa asütsü.