Langpangkong nung aliba mozü kitem shitak renema atatsüla : LTM

Mkg.April 11 (TYO) : Tang alima ajaklen ayimsünga Covid 19 tashidak mesen agi tasütama lendong tulu agüja amokmerenba mapang, Nagaland nunga, talisa, Assam artsülen alirtem, parnok nübo ishika dang süaka, parnoki bendanglen nungi tangar marudaktsütsü asoshi kanga meranga inyakdagi, anungji ano government-ia yaktasa nübortem aser mozü kidang inyakertem asoshi nüngdakba osettem ajak tongtsütsüla ta Langpangkong Tzükong Mungdang (LTM)-i tanü metetdaktsüogo.
Iba rongdak nüngdakba ken o ya Honibar nü LTM-i Mokokchung Deputy Commissioner nem agütsüba shidi ka nung metetdaktsüogo.
Iba shidi nungji, “Langpangkong kübok, talisa, Assam artsülen alirtemji anogo shia ayanga chiyongertem teimba lir, aser tang tashi nung osangtsüsang ajanga metetdaktsüba dak alaka government nungi teyari kecha tonga mali, anungji yaktasa senotsü aser jangotsütem kechi teyari agütsütsü lateta ali, item teyaritemji tongtsütsüla,” ta LTM-isa metetdaktsü.
“Tanga Assam aser Nagaland süngküm Watiyongpang nung Nagaland police-temi kanga junga nükdagi saka ano tezülen Wameken yimsen, Kangtsüng yimsen, Anaki yimsen aser Anaki (C) len nungi bendangertem arutsüsa lenmang sadema alinungji, ilenjia teti atema süngküm yanglutsüla aser ano tanüker sepaitema talila yoktsüla ta LTM-isa metetdaktsü.
“Langpangkong nung Community Health Center ana, Primary Health Center ana den ano Sub Primary Health center-tem lir, ajisüaka item mozü kitem nungji tang ama tashidak wara tulu agi shirangertem yaritsüsa kiojen aser osettsüset shitak renema mali, anungji itemji yaktasa repranga nüngdak peridaktsütsüla ta LTM-isa metetdaktsü.
Item mozü kitem nung inyakertem atema tashidak memenatsüsa sübotsü aser osettem peria akatsüla aser shirangertem asoshia ventilators, medical oxygen aser mozümora ajak shitak alitsüla ta LTM-isa takangba ka agütsüogo.
Iba denji ano state süngküm nung anüker police-tem nema nüngdakba süoshi shitak agütsütsüla ta parnokisa metetdaktsü.
“Ano, tang amaisa nübortem kecha lenia moudaktsüi kidang amongtsüsa kümra, kanga timatemtsü alinungji, tang yongi nübortem asoshi jangotsü shitak bener arua yudaktsüner ta LTM-isa metetdaktsüogo.
“Ano, parnokisa Assam len nungi Nagaland-i aitba garitem ajak tashidak mesen südaktsütsü asoshi süngküm atena maitdangsa mozü tzü raka shidoktsüla ta takangba agütsü.”LTM lenirtemi taoba hopta nung Langpangkong nung aliba mozü kitem aser Watiyongpang süngküm tashi luagi government ketdangsertem aser sepai tanishirtem ajurua tensa tia asadanga nüngdak ken o lemsatepa liasü.