Nagaland nungi sample ajak ‘negative’ putetogo

Dimapur, April 11 (TYO): Honibar nikongtsütsü 5:00 ako tashi nung Nagaland nungi COVID-19 tendangtsü atema sample 70 bener yokba nungi ajak ‘negative’ ta osang aruogo, ta Principal Secretary, Home, Abhijit Sinha IAS-i ashi.
“Indian Air Force (IAF) tayimtsü ajanga tanü Nagaland sorkar indang medical khu pezübuba New Delhi nungi bener aruogo. Tanü bener aruba khuji Kohima-i bener arutsü aser idak nungi district balala dangi yoktsü” ta Abhijit-isa ashi.
Tanü tashi nung Nagaland kübok tesem ajungalen jangotsü, mozü, totzü aser tanga tongtipang nüngdaktem aja peria aliba osang nguogo, ta paisa shisem.
“Honibarnü Prime Minister Narendra Modi-i state ajak indang Chief Minister tem den video conference agiogo aser iba mapang COVID-19 indang osang metetpelaogo” ta Abhijit-isa metetdaktsü.
Iba mapang linük ajunga shibangba mapang atsülangtsü atema tebilembatem lemsatepa liasü, ta paisa ashi.
Iba video conference nung Nagaland Chief Minister, Deputy Chief Minister, Health & Family Welfare Minister, Chief Secretary aser tanga tongti ketdangsertem aden.
Senden nung Chief Minister aikati parnok state nung mapa inyakba osang lemsatepba den linük ajunga shibangba mapang atsülangtsü atema metetdaktsü. Prime Minister-i nisung ajak dang taruba hopta asem-pezü ka kanga kümdanga alitsü atema ayongzük aser linük ajunga shibangba mapang atsülangtsü tebilembaji Centre sorkari asadanger telemtetba ka agitsü ta ashi.
Prime Minister den video conference aliba sülen Nagaland Chief Minister-ia District Task Force tem den video conferencing ajanga senden ka mena liasü, ta Abhijit-isa ashi.
Iba mapang Chief Minister-i COVID-19 anema mapa tajung inyakba atema ketdangsertem nem tenüngsang agütsü aser linük ajunga shibangba mapang nüngdakbapurtem yaritsü ayongzük.
Iba mapa dak sendakba nung khuret kar dang ajurura Chief Secretary aser tanga ketdangsertem nem osang sangoktsütsü atema Chief Minister-isa metetakja liasü, ta Abhijit-i ashi.
“COVID-19 ajanga linük ajunga shibanger tanü agi anogo 18 tashi arudang, nisungtemi tashi angaa yaritepba atema kanga pelar” ta paisa shisem.