Nagaland atema tasa tanga ka nüngdaker

Dimapur,Rongchii/April 12 (TYO): Linük ajunga mokdanga ayuba ajanga tashidak menatepa aotsü ana nung aliba aser nütsüngyoksük aika aliba tesemtem nung Covid 19 tashidak prokshia aoba tajemba kümdakja nokdangtetogo, ajisüaka Nagaland nung tensa khenyongi balaka lir aser iba tebilemtsü bentettsü asoshi tanga lenmang ka bushitsüla, ta Diphupar, Dimapur nung alir Vezoto-i ashi.
Kohima aser Dimapur amala yimti tulutem nung arrtsü shibanga ayutsüji kanga tongtibang saka asenok state ya tilaka dang aser nütsüngyongsüka ajema lir, anungji state mesera international arrtsü anasa maliba mesera lendong nung maliba yimtsüng aser district tem nungbo ozüng tesashi benoka inyaksangshi masütsüla. Iba ajanga Medical aser Police personnel tem inyaksangshi nung kongshiba dang masü saka iba ajanga anogoshi inyakyim nung kanga mejungi kongshitsü aser nüburtem, tanur aser kaketshirtemi iba khuret abentsü.
Asenok den mapetba tetuyuba sülen tenük amor manidaki state atema tasa tasen yanglushitsü kanga nüngdaker. Tang tashi nung state nungbo iba tashidak keta alir ka danga meputetba atema Tsüngrem tenüng asanger, saka asenok rongsen ajak chireptar aser kobika bener otettsü mejangjai kümogo.
Asenok asoshi tongtibangiba maparenji tekümdangtsü prokshitsü aser mitkar maparen akangshitsüla. Iba atema department tem dak dang memetaloki Arogo, jila aser yimtsüng administration-i shilem tulu ka agitettsü. Ni state nung lenir aser mongintem dang iba tashidak nungi asen nüburtem kümzüka ayutsü asoshi aser state nung memenoi asen den apet jenjang tasen ka agitsü mepeshir, ta paisa ashi.