Mangkolemba Sub-division kübok makamaiter nem teyari agütsü

Dimapur, Rongchii/April 14 (TYO): Alima ajunga sünga prokshia aliba novel coronavirus tashidak nungi jenbua alitsü mechi linük aser state tesem ajungalen shibanger aliba mapang Minister, Higher & Technical Education, Tribal Affairs, Nagaland aser State BJP tir, Temjen Imna Along aser Advisor, Treasuries & Accounts, National Highways, Dr Longriniken nati achayanga April 08 nungi 11, 2020 anogotem nung Mokokchung district kübok Mangkolemba sub-division nung aliba yimtsüngtem nungi makamiter aser talisa matamabensar aser teintet rongtem nem jang-o-tzü angadi lema agüja liasü.
Mangkolemba sub-division kübok ADC Mangkolemba-i anir Headquarters pezü lir (Border Magistrate kübok Merangmen Hq, EAC Longchem Hq, EAC Alongkima Hq, ADC Mangkolemba) aser yangji yimtsüng 40 dak tema lir.
ADC Mangkolemba tawabangba kübok item yimtsüngtem nung coronavirus mechi tesem ajanga nokdanga aliba mechi timtema aliba nüburtem, talisa teintet rogo aser matamabensartem nem jang, dal, alo aser totzü angadi lema agütsüba den külemi sub-division kübok CHC 1, PHC 4 aser sub-centre 20 nem surgical mask, gloves aser phenyls amala osettem agüja liasü, ta menur aruba osang ka ajanga ashi.
Sub-division kübok yimtsüngtem nungi putu menden den angatettepa item teyari oset ya lemdanger agütsü, ta osang ajangasa ashi.