Mkg nung nisung ka quarantine süa lir

Dimapur, April 14 (TYO): April 13, 2020 nü Mokokchung nung Jorhat nung alir tsümar ka Quarantine facility centre nung yua lir.
Iba nisung ya ambulance ka nung anir aru aser Tsutapela Check Point nung jungjunga tendangba sülen Mokokchung-i anir aru, ta Superintendent of Police, Mokokchung-i tanü sangdong ka nung metetdaktsü.
Pa ya Lemjem Hospital Mokokchung nungi Jorhat mesüra Guwahati nung anepalutsü atema yok aser pa Sanjivani Hospital, Jorhat nung amungba sülen Mokokchung-i meyipa aru.
COVID-19 inyakyim lateta aliba ama iba nisung Quarantine facility centre (Multipurpose sports Complex) Mokokchung nung yua lir, ta SP, Mokokchung-isa ashi.
Külen, Dimapur nung alir ka dak COVID-19 aketba putetba sülen, Mokokchung District Task Force-i tuyuba ama Mokokchung-Wokha-Kohima nung inter district check point lapokogo aser iba nung gari ajak mita reprangtsü, ta SP-isa shisem.