May 3 tashi linük shibangtsü: PM Modi

New Delhi, April 14 (Agencies): Mongulbarnü Prime Minister Narendra Modi-i May 3 tashi linük ajunga shibangtsü mapang atsülang aser April 20 nü tenokdangba agüja alibatem meyipa reprangshimtsü telemtetba agiogo.
“Tebilemba ajak angadangba sülen, onoki May 3, 2020 tashi linük ajunga shibangba atsülangtsü lemtetogo” ta tanü Modi-i minute 25 o jembidang ashi.
“April 20 tashi district aser state shia nung mapa inyakba jungjunga repranga atatsü. Iba sülen jiang tenokdangbatem salatsü atema meyipa reprangshimtsü” ta paisa ashi.
Tanü tashi nung India nung COVID-19 aketer ajak agi nisung 10,363 aser tasür 339 liasü, ta Health Ministry-i metetdaktsü.

Nagaland shibangba atsülanger
Dimapur, April 14 (TYO): National Disaster Management Authority (NDMA) aser Ministry of Home Affairs (MHA) ajanga tetuyuba agütsüba nung ajemdaker May 3 tashi Nagaland state ajunga shibangtsü, ta Nagaland Chief Secretary-i taonung sangdong ka nung metetdaktsü.
Iba ya COVID-19 azüoktsü atema lir aser Nagaland sorkar kübok Department ajaki tenokdangba agüja aliba ama mapa inyaka aotsü tuyur, ta Chief Secretary-isa ashi.