Meghalaya nung COVID-19 agi asüba mang aremtsü makoker

Shillong, April 15 (Agencies): Meghalaya nung COVID19 agi shiranga asüba mang aremtsü atema sorkari tetsükdaktsü ka ajurua lir.
Bethany Hospital nung Director, Dr. John L Sailo Ryntathiang dak Hombarnü COVID-19 aliba putet aser pa tanep 2:45 ako meta asü.
Dr. John asüba sülen Meghalaya sorkari Bodbar anüngdang WHO aser India sorkari lateta aliba ama pa mang aremtsü atema sentong renem.
Sorkari Shillong nung aliba Jhalupara crematorium nung pa mang aremtsü lemtet saka Jhalupara nung alirtemi iba mapa inyaktsü atema temelaba magütsü.
COVID19 agi shiranger aremtsü atema infrastructure shitak mali aser iba jagi iba tesem nung virus prokshitsü ta Jhalupara nung alirtemi ashi.
Parnokisa ashiba agi, crematorium nung mapa inyakertem asoshi safety gear mesüra personal protective equipment mali.
Jhalupara crematorium nung mang rongdokba sülen autji süngden ka nung enoker Nongpoh anasa asür Dr. Sailo Rynthathiang’er farm house nung aremtsü ta sentong renem.
Ajisüaka, Nongpoh Dorbar Shnong indang Executive Committee-i COVID19 agi shiranga asüsangji par farm house nung aremtsü memelatsü ta telemtetba ka agi.
Iba temeket nung alirtemi virus prokshitsü tsübur aser tebilemtsü abener, ta Dorbar züngsemtemi ashi.
Iba onük atema Meghalaya Health minister A.L. Hek den osnag agitepdang, tasümang aremtsü atema khuret ka ajurua lir aser iba atema sorkar ketdangsertemi Jhapupara nung alirtem den jembidar.
State sorkarisa Nongpoh Dorbar nung lennirtem den COVID19 agi asüsang indang aut aremtsü atema jembitepdar, ta Hek-isa ashi.