Phek nungi MLA temi mozü kitem sema senzü

Kohima, April 17 (TYO): Honibarnü Planning & Coordination, Land Revenue & Parliamentary Affairs Minister aser Phek District atema COVID-19 minister in charga, Neiba Kronu-i Phek district head quarter semdanga liasü.
Tanü Kronu den MLA Kuzholuzo Nienu aser MLA Kezhienyi Khalo nungertemi Phek Deputy Commissioner indang office chamber nung district Administration, Security forces, Food & Civil supplies ketdangsertem den senden ka amen.
Senden nung Minister Kronu-i ketdangsertem dang COVID-19 wara tamajung anema külemi yaritepa inyaktsü aser shibangtsü tuyuba sülen anidaktsü atema ayongzük.
Paisa Phek District nungi MLA ajak tenüng nung COVID-19 anema tongti süa inyakertem nem tenüngsang agütsü aser maneni sorkari den yariteptsü mepishi.
MLA Kuzholuzo Nienu-ia tongtipang nüngdakbatem timi amshitsü kanga tongtipang lir aser iba maparen ya local lennirtem den amalitepa inyaktsüla ta ashi.
MLA Kezhienyi Khalo-ia Personal protective equipment (PPE) aser tanga protective gears asoshi tebilemtsü abenba lemsatep.
Parnokisa district hospital Phek semdang aser staff den ajurutepa sensaksem.
Tanü Minister Neiba Kronu-isa PHC Chizami semdang aser Kohima-i meyipa arudang Chozuba nung hospital semdang aser Pfutsero nung ketdangsertem aser public lennirtem den ajurutep.