Red Cross, NYV aser NSS Volunteer tem nem training agütsü

Dimapur, Rongchii/April 20 (TYO): Angh aser Ex- Officio President Indian Red Cross Society, Nagaland State Branch-i tuyuba ama aser Nehru Yuva Kendra Sangathan (NYKS) headquarter New Delhi guidelines dak ajemdaker Mokokchung Deputy Commissioner-i tuyuba ama Red Cross Volunteers aser National Youth Volunteers tem atema COVID-19 dak sendakba nung April 20 nü Chief Medical Officers Conference hall nung training ka ayongzüka katsüogo.
Chief Medical Office nungi sangdong ka ajanga shiba agi, volunteer tem nem tashidak poktetba tera, kodaser nokdangtsü, azüoktsü asoshi jenjang balala agiba, mozü agi anepaluba yimya, supportive environment, teka mapang shia metsükba amala merekmeju inyakyim, lokti nung tetsüngda ita inyaksangshitsüba, mask amshiba yimya, lokti adenshidaki takok tashi maotsüba, amala onük tem nung tangazükba agüja liasü. Kasa mapang nung parnok nem tashidak keta aliba temaitsü mesayu tsüngda incubation period indang tangazükba agütsü.
Teka metsüba yimya jenjang 7 aser Bio Medical waste management indang video tatsüka sayuba den teka metsüba yimya, mask aser glove amshiba aser indokba yimya volunteer tem dang inyaka sayuogo.
Iba den bendenloksema kasa onük nung ajemdaker Fazl Ali College Mokokchung nunga NSS volunteer tem nema training agütsüogo.
Training sentong nung shisalen agütsürtemji Dr Aonungdok Epidemiologist aser Dr Tsipongchem Pathologist na liasü.