Nagaland House, New Delhi-i pelaba metetdaktsür

Dimapur, April 20 (TYO): March 22. 2020 nü linük nung Janta Curfew tenzükba sülen Nagaland nungi arurtem anendaka aliba osangtem angashia March 23, 2020 nü Dy. Resident Commissioner, Nagaland House, New Delhi indang office nung senden ka amen.
Iba sülen Nagaland sorkari Resident Commissioner, New Delhi indang office ajanga control center ka lapok aser iba ajanga Nagaland nungi kaketshirtem/mapa inyakertem aser shirangertem yaria arudar.
Tanü tashi nung Nagaland House nung passenger 13 tashi anenzükdaktsür yaria arudar. Nagaland House nung control centre ajanga NGO tem den yaritepa nüngdakbapur nem chiyungtsü agütsür aser iba mapa nung Delhi nung Naga nunger teintet rogotem, Pastor tem, kaketshir teloktem, Delhi Police aser NGO-i yariteper, ta Nagaland House, New Delhi, PRO (IPR) Kuolie Mere-i sangdong ka nung ashi.
Taoba hopta asem tashi linük ajunga shibangba mapang kaketshir teloktemi yaria Nagaland sorkari nisung 400 tema nem dry rations agütsüogo aser Delhi NCR nung medical team-i shiranger 15 yariogo aser ano teinyaktsü aika lir, ta paisa ashi.
Delhi NCR nung alirtem yariba mapa nung Naga kaketshir tentettem, Delhi Police (SPUNER), kin teloktem, Naga nunger teintet rogotem aser unit arogotem/fellowship temi yaritepba atema Nagaland House, New Delhi nung Control Center-i kanga pelar, ta Mere-isa metetdaktsü.
Delhi NCR nung inyakba Nagaland nungi doctor aser nurse temi asen nübortem kanga yaria arudar. Nagaland Chief Minister-i CMRF ajanga Nagaland House New Delhi nem Rs. 4,00,000 agütsüogo aser iba ajanga asen nübortem yarir, ta paisa shisem.

Control Center Nagaland House, New Delhi indang emergency contact details:
*   Land-Line – 011-23013751
*   Kethosituo Sekhose, Dy. RC: 9436001625 (WhatsApp),
*   Kuolie Mere, PRO: 9910291960,
*   Dr.Hentok Phom, Sr. MO: 8826787100,
*   Kedichatuo Kense, ALO: 8130698329 Email -rcnagalandhouse@gmail.com

Delhi nung kaketshir teloktemi pelar

Külen, Delhi nung Nagaland Students Union balalai sangdong ka ajanga Nagaland House ajanga state sorkari teyari agütsüba atema pelaba metetdaktsüogo.

Kethosituo Sekhose DRC Nagaland House GON, Kuolie Mere PRO Nagaland House GON, Dr Hentok Phom, Senior Medical Officer GON aser Nagaland House nung ketdangsertemi mapang shitak nung teyari balala agütsüba atema kanga pelar, ta Sumi Students Union Delhi (SSUD), Delhi Eastern Nagaland Students Union (DENSU), Ao Students Union (ASUD), Lotha Students Union (LSUD), Nagaland Zeliang Students Welfare Delhi (NZSWD), Chakhesang Students Union Delhi (CSUD), Rengma Students Union Delhi (RSUD), Pochury Students Union Delhi (PSUD) aser Angami Students Union Delhi (ASUD) teloktemi sangdong nung metetdaktsüogo.