TR. Zeliang-i Peren district nung mozü kitem semdang

Dimapur, Rongchii/April 20, 2020 (TYO): Hombarnü, Opposition lennir, TR Zeliang-i Jalukie nung lapoka aliba COVID-19 Hospital aser Peren District Hospital semdanga liasü.
Iba mapang TR. Zeliang-i District Administration den senden ka amen aser idangji Peren DC aser Peren SP nati anir CMO aser F&CS nungi ketdangsertem den lokti tentet aser NGOs balala nungi teshimtet nisungtem aden.
Coronavirus wara agi shirangertem anepalutsü asoshi, Jalukie nung lapoka aliba COVID-19 mozüki nung ventilator den ICU ka danga mali aser iba den doctor aser nurse temi amshiba Personal Protective Equipment (PPE) ya sü tamajung (quality tamajung) indang lir, koba atangji nunga sorkari sangdongba amabo mapa agi mesayur, ta TR Zeliang-i ashi.
“Doctor aser nurse tem ya sepai tanishirtem ama lir, parnok nem sübosolemtsü tajung peria magütsüra, shibai tasü itta COVID-19 anema raraba nung noktaktsü aser shibai jakyim sür anitsü? Iba rara nung takok angutsü asoshi asenoki kechi teimla yutettsü? District tsüngda telemsa kecha malitsüla, kechiyong coronavirus wara nungi district ka danga jenbua mali” ta paisa metetdaktsü.
“Iba mozüki nung Doctor aser nurse nem agütsüba PPE ya “HIV KIT” label ajena lir. State kübok tanga district nunga iba amala PPE ya dang lema agütsür asü? COVID-19 agi shirangertem anepalutsü asoshi amshiba PPE jenjang ya iba amai dang amshir asü? Parnok kümzüka alitsü osettsüsettem maliyongjia Doctor aser Nurse temi tashidak menatsü metsübui temulung ula shiranger anepalutsü mulunga lir asü?” ta TR Zeliang-isa asüngdang.
Paisa, iba tensa nung sorkar den yaritepba tongtibang kin tentettem aser NGOs den ajurutepa sensaksema liasü.
Iba ama mapang aayangertem aser tekübok jenjang nung alirtem kanga dang rokongba metetdakja, Zeliang-i National Food Security Act kübok Centre-i scheme balala indang metetdaktsü.
Mezüngbuba, Antyodaya Anna Yojana (AAY), koba ajanga ration card alir kilen shia nem ita shia jang seret ka nung sen 3 yong jang-o-tzü seret 35 aser tanabuba nung, kilen nungi Priority House Holds (PHH) alir züngsem shia nem ita shia jang seret ka nung sen 3 agi jang seret pungongo agütsüdaki. Pradhan Mantri Garib Kalyan Yojana kübok, ration card alir shia nem April, May aser June ita taa magi angati yong jang-o-tzü seret 5 (pungongo) agütsütsü. Anungji item tajangzük angutsüpurtem peridaktsütsü asoshi district nung ADS-i anir F&CS department ajanga iba scheme takok ngua inyaktsüla, ta TR Zeliang-isa ashi.