Doctor-temi teni tebang nembangba ‘mask’ shitak meshir

Mkg., April 20 (TYO) : Joko tsükchir among tonga aruogo saka asenok ket nung nok nü shitak renema mali, süng long agi raratsü asü, ajentsü ta asüba tensa ka nung tanü Nagaland coronavirus anema raraba tongpang nung nokdaka lir. Ibaji nübortem asoshi kanga shisabolutsü mapang ka lir.
Iba ama tia ka nung, shisabolu marem, Mokokchung Covid Hospital nung inyakertemi taoba hopta nung Health & Welfare Department nung Principal Director dangi Covid19 agi shirangertem anepaludang amshiba ‘mask’ (teni tebang nembangba sü) shitak magütsüra, onok taküm agi tendangabo Covid mozü kidang meinyaktettsü ta tezüluba ka nung agütsüogo.
India government nungi Ministry of Health & Family Welfare, Directorate General of Health Services (Emergency Medical Relief) nungi tetuyuba agüja aliba nung Covid19 agi shirangertem anepaludang amshitsü atema shimtetba mask-ji N-95 (FFP-2 mesüra FFP-3) lir saka tang Nagaland nung amshitsü agüja aliba yabo N-95(FFP-1) lir, iba jagibo shirangertem anepalu dang tashidak nungi onok mekümzüktettsü ta Mokokchung Covid Hospital nung inyakertemi metetdaktsüogo.
Anungji, shirangertem dak nungi tashidak memenatsüsa onok nem mask shitak magütsütetra, onokbo covid19 mozü kidang meinyaktettsüsa akümtsü ta parnokisa metetdaktsü.
Iba osang angashia, iba osangbeneri Nagaland government nung tongti ketdangser ka den asüngdangtep dang, mozü kidang inyakertemi meshiba amaji mask-ji shitak melentsütsü ta metetdaktsü.
Angazükba agi, Manipur nungbo Covid19 agi shirangertem yaritsü purtem atema, Nagaland nung ama, süoshi shitak masü agütsürtem anema government-i bushisüngdang tenzükogo.

IMA-i ozüng yanglutsü akhanger
Dimapur, April 20 (TYO): India nung doctor tem aser mozü kitem anema mapa inyakba atema sorkari Central Law ka meyanglura Indian Medical Association (IMA)-i lungkak aittsü ta tanü metetdaktsüogo.
April 23, 2020 nü IMA-i Black Day ayongzüka amongtsü aser iba anogo nung linük doctor ajaki badge tanak khaloktsü, ta tanü IMA sangdong ka nung metetdaktsü.
Black Day amongba sülen sorkari teinyaktsü mapatem meinyakra, IMA-i tarutsü atema telemtetbatem agitsü, ta IMA National President, Dr Rajan Sharma aser Hony Secretary General, Dr. RV Asokan nati sangdong nung ashi.