Mon nung War Room amenokogo

Dimapur, Rongchii/April 22 (TYO): Mon Deputy Commissioner-i sangdong ka ajanga 10/04/2020 nü DRDA Conference Hall Mon District COVID-19 War Room amenokba metetdaktsüogo. Iba telok nung District Administration/Police/Health aser family Welfare aser district kübok tanga line departments tem nungi ketdangsertem densema lir.
War Room ya osang bendendak tesem ka lir aser iba den ano quarantine nung aliba nüburtem anogoshia iba Room ajanga asadanger. District War Room-i achaayanga District ajunga nung Active Case bushidar aser team nung züngsem aser volunteers tem nem training agütsüba den contact Listing & Cluster Containment Strategy mapa inyakdar.
Kasa mapang nung Tobu, Aboi, Tizit aser Naginimora Sub-Divisions nung Sub-Divisional War Room amenokogo aser item War Room tem ya District COVID-19 War Room den sendaktepa inyakdar.
Maneni DC Mon-i ashiba agi, Mon District Administration-i achaayanga ‘Contact Listing & Tracing’ onük nung ajemdaker COVID-19 District Control Room/War Room Personnel, Police aser Frontline Health workers tem atema April 20 nü training sentong ka katsüogo.
Iba sentong nung shisalen agütsürji Dr. Kumkiuba liasü, kong pai Mon District nung contact listing aser tracing plan indang metetdaktsü, koba COVID-19 agi shirangertem den ajuruteper alirtem bushitettsü aser parnoki lokti nungi pilaa ayutsü asoshi nükjidong nung inyaker, ta paisa metetdaktsü.