Nehemiah Vision Trust-i teyari agütsüdar

Dimapur, Rongchii/April 22 (TYO): Eastern Nagaland nungi arua azünger Students tem pei kidangi moteti alibatem Shalom School Longwa, Longwa Yimtsüng, Mon District Nagaland nung Nehemiah Vision Trust ajanga teyari agütsüdar. Government of India March 24, 2020 nü nungi tenzüka linük ajunga mokdanga ayutsü asoshi sangdongba sülen kaketshir parnok 26 students nem Chiyungtsü, talitsü ki agüja anepaludaki. Shalom School Longwa staff terok (6) iba Relief Camp nung monga yaridar. Tanü tashi nung teyari ajak Nehemiah Vision Trust ajanga agütsüdar.
Longwa Yimtsüngji kanga tezülen lir aser linük mokdanger aliba ajanga joko Chiyungtsü aser nungdakba osettem Mon aser Assam nungi bener maruteter. Chiyungtsü aser nungdakba osettem koba bendena liasü, itemjia joko tatemer. Linük mokdanga aliba yakta melapokra tanurtem atema chiyunga ajemtsü agutsütsü asoshi khuret kanga tuluka akümtsü.
Tang tashi nung tezulen nungi arua teyari agatsübabo mali. Anungji, telok, kicha aser kibongtem kari danga yarinüa lira kanga pelatsü. Teyari agütsünertemi Head Teacher Wapang Lemtur tem item number 08119822805 / 09862779572 ajanga tongteprateptettsü.
Iba den kulemi April 11, 2020 nü Nehemiah Vision Trust ajanga Kuda Mill Area, Dimapur Nagaland nung Relief mapa (Chiyungtsütem) nungdakba kibongtem nem agüja liasü, ta Nehemiah Vision Trust Dimapur Director Rev.Talimeren Longkumer-i sangdong ka ajanga metetdaktsü.