BJP Mokokchung ajanga COVID-19 atema renemshir

Dimapur, Rongchii/April 22 (TYO): COVID-19 tashidak wara nungi jenbutsü mechi linük ajunga nung anemponga aliba ajanga timtem balala ajurutsü südi, ta bilema aliba anepalutsü asoshi BJP Mokokchung district ajanga mera ka agiogo.
‘BJP, Mokokchung District COVID-19 Control Centre’ ka amenokogo, kong Nukshi I. Ozukum (vice president BJP Mokokchung Dist.) ya convener ama aser S. Moa Imsong aser T. Anungla nungertem lir.
Linük ajunga anempongba mapang Ato Kilonser Narendra Modi-i ayongzükba ama, BJP Mokokchung district ajanga mezüng anempongba mapang nüngdakbapur nem teyari balala agüja liasü. BJP, mokokchung district atema item teyari osettem ya BJP Mokokchung district tir Imolemba Jamir, Advisor aser MLA Dr. Longri (district in-charge) aser party nung tenzükertemi agüja liasü.
BJP, Mokokchung ST Morcha ajanga police aser healthcare nung inyakertem ama frontline worker nem süngo lema agütsü aser party indang Minority Morcha ajanga Mokokchung jila nungi moteti alina migrant tem nem angadi chi chiyongdaktsü.
BJP district president Imolemba Jamir, shibai item teyari agütsüba maparen ketdangser, pai ashiba agi, centre nung aliba BJP sorkar aser grass root level nung aliba party ajanga lungjemer iba virus madak takok angutsü aser BJP Mokokchung district ajanga nüburtem nüngdakba nung yariteptsü asoshi teti renema lir, ta BJP, Mokokchung district sangdong ka ajanga ashi.
BJP Mokokchung tir-isa ‘BJP, Mkg Dist COVID-19 Control Centre’ aser Mandal level nung iba tashidak wara den raratsü asoshi tenteta aliba party züngsemtem den pelaba lemsatep.
Iba virus madak takok angutsü asoshi BJP nung inyaker aser ketdangser ajak dang anibelem mesasai inyaka PM CARES fund nung sen tenlatsü Imolemba Jamir-isa ayongzüka liasü.
Kasa mapang BJP, Mokokchung district ajanga Mokokchung jila nung timtem nung alir kibong shia nem jang seret ter den dal seret kaka agüja liasü. Ano maneni ward balala nung mapa meranga inyakba ngua tepela temaitsü ward council tem nem jang bag kaka den dal bag kaka agütsü.
Maneni COVID-19 tashidak wara nokdangtsü mechi Mokokchung District Task Force-i anir district administration, doctor aser nurse, police, ward aser yimtsüng ketdangsertem aser frontline worker temi meranga inyakba atema BJP Mokokchung ajanga pelaba lemsateper, ta sangdong ajangasa ashi.