DY. Chief Minister-i Ralan tesem semdang

Dimapur, Rongchii/April 26 (TYO): Dy. Chief Minister, Home & Road and Bridges, Y.Patton, shiba Wokha district COVID-19 In-Charge lir pai anir Wokha District nungi MLA pezüi April 25 nü Ralana tesem semdanga parnok terenemshiba asadangba den nüburtem den sensaksemogo. Parnoki iba tesem semdangba nükjidong tongtibangbaji Ralan tesem nung COVID-19 atema terenemshiba tsüngtong oa asadangtsü asoshi liasü, kechiyong iba tesem ya Assam den arrtsü nung lir.
Ralan Area Lotha Hoho, Chairman, Samuel Ovung-i iba tesem nung aliba nüburtemi COVID-19 tashidak nokdangtsü asoshi jenjang tapet agiba atema tenüngsang agütsüba den iba tashidak azüoktsü asoshi tebilemtsü tulutibaji health care facilities peria maliba aser tashidak anepalutsüpur peria maliba ya lir ta shia Dy. CM aser MLA tem dang PHC Ralan-i tangsa tang Medical Officer ka yoktsü asoshi mepeshi koba tang tashi tazüng lir. Maneni linük ajunga mokdanga aliba maongka agia temesepba mozü shibelener senzüsenpongba azüoktsü asoshi security talila yoktsü paisa mepeshia metetdaktsüogo.
Kasa mapang nung timtem aser tetsükdaktsü aika liaka nüburtemi tashidak azüoktsü asoshi khuret bena jenjang tapet agiba atema Y.Patton-i parnok nem tenüngsang agütsüba den pa aser MLA temi nüburtem tebilemtsütem temaba jenjang nung tua benoktsü ta nangzüka liasü.
Y.Patton-isa, Chief Medical Officer, Wokha nem jongadak mapang kecha tetsükdaktsü makai amshitettsü atema ambulance pezü anepalutsü asoshi sen lakh 20 amokja liasü.
Dy. Chief Minister meina Advisor, Horticulture & Border Affairs, Mathung Yanthan, Advisor, Higher Technical & IT, Science & Technology, New & Renewable Energy, Mmhonlumo Kikon, MLA Dr. Chumben Murry, Jt. Secretary Border Affairs L.Jamithiung Lotha, DIG (Border) Videlalie Zashumo, Sr. SP (Border) James Mhonbemo Humtsoe, DC & Chairman District Task Force Wokha, Orenthung Lotha, CMO Dr. W. Tungoe aser DDMA Wokha unit Mercy Kithan nungeri iba tesem semdangogo, ta ketdangser sangdong ka ajanga metetdaktsü.