Nagaland nungi yokba sample ajak negative putet

Dimapur, April 26 (TYO): Dimapur nung alir ka dak COVID-19 aliba putetba sülen pa aliba temeket ‘containment zone’ ka kümdaktsür Surveillance maparen inyaker.
Tang tashi nung iba temeket nung kibong 1005 nungi nisung 5,667 tashi screen süogo, ta Principal Secretary Home, Abhijit Sinha-i ashi.
Iba nisung dak sendakba nung samples 427 tashi tendangtsü atema yoka liasü aser ajak negative ta putetogo, ta Abhijit-isa metetdaktsü.
“Deobar nikongtsütsü 3:00 ako tashi nung Nagaland nungi sample 613 tashi tendangtsü bener yoka liasü aser ajak negative ta putetogo. Tang Facility Quarantine nung nisung 36 yua lir,” ta paisa shisem.
Linük ajunga shibangba mapang tenokdangba kar salatsüba ajanga dokan talila aika lapoktsü. Ajisüaka, iba dak sendakba nung Deputy Commissioner temi pei pei district sasep nung tetuyubatem agütsütsü, ta Abhijit-isa ashi.
Dokan lapoktsü temelaba agüjaka, dokan kiburtemi nüngdakba mapa ajak inyaktsüla aser nisung o nisung tsüngda tepila ayutsüla. Iba denji health dak sendakba maparen ajak inyaktsüla ta paisa nenshia metetdaktsü.
Nagaland kübok tesem ajungalen jangotsü, mozü, totzü aser tongtipang nüngdakbatem ajak peria dang lir, ta Principal Secretary Home-isa ashi.