Kohima Dist-i achaayanga nüburtem pei dist-i yokogo

Dimapur, Monupii/May 7 (TYO): Covid 19 tashidak poktetba ajanga linük mokdanga ayuba agi taolen makai alirtem district ka nungi district kati yoktsü asoshi sorkari tetuyuba agütsüba sülen Kohima District administration-i jenjang tapet agia May 7 nü Kohima nungi moteti aliba kaketshir aser ayangertem pei district-i yokogo.
Pei district-i moteti alirtem yoktsü asoshi May 6 nü tashi nung jurila gari 400 dak tema nem one way permits agütsüogo. Jurila garitem dak alaka sorkari May 7 nü nungi tenzüka bus tem agütsüdar.
May 7 nü bus 38 nung nisung 1109 mener Kohima nungi pei district bushia ogo. Bus tem rongnung bus 12 Mon, bus 5 Tobu (Tuensang), bus 8 Tuensang, bus 3 Mokokchung, bus 3 Wokha aser bus 7 Dimapur-i yokogo.
Kasa mapang nung ADC Kohima, Lithrongla Tongpi Rutsa-i, Facilitation Cell Kohima-i, tanga state nung alirtem pei talidaki meyipa onüa agütsüba application 3000 shi agizük aser jenjang tapet agitsü asoshi Nagaland sorkar dangi yokogo, ta metetdaktsü. Applicant 3000 nungi parnok 1300 Bihar nungi, Assam nungi 900 aser tanungbatem Manipur aser Assam nungi liasü. Ajisüaka Assam aser Manipur nunger shirnok ket nung pei gari lir parnokbo pei state-i aotsü asoshi temelaba agütsüogo, ta Lithrongla-isa ashi.
Maneni Minister of Housing and Mechanical and Legislator in-charge Kohima, Tongpang Ozukum-i May 7 nü Facilitation Centre Kohima semdanga, nüburtem pei district-i meyipa yokba inyakyim asadangogo.