Tamil Nadu sorkari ayongba COVID-19 senden nung Nagaland nungia aden

Dimapur, Monupii/May 07 (TYO): Tamil Nadu state nungi pei kidang/state-i moteti aliba nüburtem anepalutsü asoshi shimteta aliba Nodal Authority, S.J. Chiru, IAS aser R. Sudhan, IAS nati North East India Welfare Association Chennai, tir, Wapangtoshi (Nagaland State Nodal Officer on COVID-19 in Chennai), Dr. Hemanga Barman, Vice President aser Colney, Secretary nunger den Manipur, Mizoram aser Meghalaya state tem nungi teshimtet nübutem den May 07, 2020 nü Conference hall, Department of Agricultural Marketing Board Chennai nung senden ka mena liasü.
Iba senden nung jembiba mapang, state sorkar balala nungi temelaba agiba sülen pei talidaki moteti aliba nisungtem yoktsü asoshi Tamil Nadu sorkar renema lir, ta metetdaktsü.
Iba dak sendakba nung nisung shirnokisa pei ki aliba state-i onür, parnoki Tamil Nadu sorkar aser pei state sorkar indang online portal nung tenüng züluoktsüla.
Iba sülen pei state sorkar nungi Nodal Authority ajanga Tamil Nadu sorkar indang Nodal Authority den osang agitepa sentong renemtsü aser Tamil Nadu sorkari item nisungtem pei kidang/state tongtsütsü asoshi Railway department den lungjemer train anepalutsütsü, ta ashi.
Tang tashi Assam, Manipur aser Mizoram state sorkar temi Tamil Nadu Nodal Authority den osangtsüsang agitepa Tamil Nadu tesem balala nung alir anir aotsü atema jembir aser parnok pei state tonga aiba sülen nüngdakbatem agütsütsü renema lir, ta ashi.
Northeast state sorkar ajungai pei nüburtem state-i maruteti aliba tenüngtem ya Tamil Nadu sorkar nem agütsütsüla, ajiasünung dang parnok tekeratiba nung pei ki/state bushia anir arutsütsü, ta senden nung metetdaktsü.