Governor-i World Red Cross Day salem lemsateper

Dimapur, May 7 (TYO): May 8, 2020 nü Indian Red Cross Society, Nagaland State Branch aser Nagaland state-i World Red Cross Day amongtsü.
Indian Red Cross Society-i küm 100 ajungba benjung amongdang, maneni meimchir aser nübortem taküm tajungba alitsü atema yariteptsü, ta Nagaland Governor, R.N. Ravi-i sangdong ka nung ashi.
Taküm World Red Cross Day atema omenji ‘Volunteers nem maneni tenüngsang agüjang’ lir aser iba ya COVID-19 noktangtsü aser yariteptsü atema tongti süa inyakertem asoshi lir, ta Governor-isa ashi.
Linük ajungai COVID-19 anema raradang Indian Red Cross Society Nagaland-ia bangdakpurtem den külemi yaritepa arur. IRCS Nagaland-i administration den teka amteper mapa inyakba ajanga iba wara madak asenoki takok angutsü, ta paisa shisem.
World Red Cross Day tenüng nung ni volunteers aser staff ajak dangi tepela salem abener. aser Indian Red Cross Society Nagaland State Branch-i tarutsü anogotem takoktem angutsü aser tia tajung asütsü moatsür, ta R.N Ravi-isa metetdaktsü.