Zunheboto Task Force-i metetdaktsür

Zunheboto, Monupii/May 11, 2020 (TYO): Hombarnü (11.05.2020) Deputy Commissioner’er kidang Zunheboto District Task Force den külemi Sümi Hoho, Sümi Kükami Hoho, Sümi Totomi Hoho aser ZCMC züngsemtem senden ka agia liasü.
Medical Department ajanga agütsüba tetuyuba nung anidaka, Nagaland state adena orr tanga tesem nungi pei pei talidaki maruteti alirtem, shirnok Zunheboto district-i arutsü lir, parnok rongnung temulung melemi bilemba COVID-19 wara temaitsü alirtem Quarantine Facility centre nung ayutsü aser tanüngba temji pei pei kidang quarantine südaktsütsü, ta senden nung telok ajaki telemtetba agi.
Iba senden nungsa Zunheboto headquaters kübok quarantine facility nung yipden 50 aser Outpost Sub Division ajak nung tajemba agia yipden 10 (ter-ter) bendenloksemtsütsü; aser Medical Department ajanga tanga tesem nungi arurtem screening agiba aser wara temaitsü alirtem quarantine nung yua anepalutsü asoshi achaayangtsü, ta lemtet.
Quaranitine centre nung amunger manemertem atema pei pei kinungertemi yipden süsohi aser apok-atzü/chiyongtsü anepalutsütsüla.
Iba den bendenloksema, Zunheboto district nung Deobar anogo dak alaka, tanga anogotem nung anepdang 7:00 ako nungi nikongdang 2:00 ako tashi dokantem lapokdaktsütsü, ta senden nungsa District Task Force-i lemtetogo.