Imlibenla Wati-i Care and Support Children Home semdang

Dimapur, Monupii/May 11 (TYO): Alima ajunga nung mother day amungba anogo Miss Imlibenla Wati-i (Miss Nagaland 2012) Care and Support Children Home semdanga liasü.
Mother’s Day (10.05.2020) nüngtem nung lai Care and Support Children Home, Tsumarshiyong, Mokokchung semdang. Children Home semdangba mapang lai tanurtem den sensak asem aser tanurtem den mapang indoka liasü. La den külemi lai cake tulu ka, nanglong, amtsük, toilet needs amala tenüngdakba oset balala bener arutsü. Laisa tanurtem dang ajemalua tashi angatsü aser takoker kaka akümtsü asoshi kaket shisatsü meranga bushitsü ajungshi. Laisa, Multiple Purpose Hall nung inoktsü asoshi celling Fan tenla agütsütsü nangzük.
Kasa mapang nung tanurtemia ken aser lai zünga shilem agi aser Imlibenla Wati atema mejeta sarasademja liasü.
Care and Support Children Home temeim agi semdangba aser la mapa tajung asoshi ketdangsertemi Imlibenla Wati nem tenüngsang agütsüba den la tarutsü wadangtem nung Tsüngremi la molamoshia moajang ta sarasademtsür, ta Care and Support Society Director cum Chief Functionary, Imchawati Kichu-i sangdong ka ajanga metetdaktsü.