Odd-Even: Dimapur police-i gari 746 apu

Dimapur, May 11 (TYO): Dimapur district nung gari registration number odd aser even lemsar senzütsü tenzükba anogo nung police-i gari 746 apu aser sen lakh 1,41,050 senchi chiogo. Aibelenertem dang senchi achibaji sorkar senpongi aitsü.
“Tanü mezüng atema traffic inyakyim tasen takok ngua tenzükogo. Iba inyakyim atema tangatetba tajung nung onok den shisatsü aika lemsatepogo aser Dimapur nung traffic timtem ajema kümdaktsütsü atema police-i meranga inyaktsü” ta Commissioner Police Dimapur, Rothihu Tetseo IPS-i osangbener dang ashi.
Iba ozüng tasen angateta public-i yaritepba atema kanga pelar aser maneni public-i ozüng amertem den amalitep alitsü ayongzüker, ta Tetseo-isa ashi.
Sorkar gari aika nüngdak mali ser nung senzüba nguogo, anungji sorkar mapa inyakertemia duty mapang masüdangbo mesenzütsü mepishir, ta Commissioner Police Dimapur-isa metetdaktsü.