Sample 848 negative putet; Sample 27 indang osang mangu

Dimapur, May 11 (TYO): Tanü nikongtsütsü 4:00 ako tashi nung Nagaland nungi sample 875 tendangtsü yokogo. Iba nungi sample 848 negative putetba osang nguogo aser sample 27 indang osang mangu lir, ta Principal Secretary Home, Abhijit Sinha-i ashi.
Tanü anüngdang 12:00 ako tashi nung tangalen anendaka alir nisung 18,282-i website iamstranded.nagaland.gov.in nung tenüng agütsüogo. Parnok ajak ya Nagaland-i meyip arutsü atema tenüng agütsü, ta Abhijit-isa ashi.
Prime Minister-i tanü linük nung Chief Minister tem den Video Conference ka agi aser idangji COVID-19 tensa aser tarutsü atema teinyaktsütem indang onüktem lemsatep, ta paisa metetdaktsü.
Iba mapang Chief Minister-i Nagaland nung lockdown dak sendakba maparen inyakba, tangalen anendaka alirtem yariba aser state nung tangalen nungi aruba aayangertem yariba osangtem lemsatep.
Paisa inter-district senzüsenbongba aser tangalen anendaka alirtem Nagaland-i meyipa anir arutsü atema mapa inyakba osang metetdaktsü.
Tangalen anendaka alirtem anir arutsü atema Special Train nüngdaker saka passenger train aser air services khen tatsüka sota atatsüla, ta Chief Minister-isa ashi.
Iba senden nung Chief Minister den Deputy Chief Minister, Planning & Coordination Minister, Chief Secretary aser tongti ketdangser aika aden.
Tanü Chief Minister-isa Kohima nung NBCC, Joint Christian Forum, APO, AWO, AYO aser ASU tanishirtem den senden ka amen.
Iba mapang linük ajunga shibangba ajanga tebilemtsü balala ajuruba onüktem lemsatep aser asen peritsüsa jangotsü aser chiyungtsütem anepalutsü atema mapa inyaktsü tebilembatem lemsatep liasü.
Tia makai COVID-19 agi shiranga asü nungbo, tashishitep kecha melii inyakyim shitak amshia leper nung remdaktsütsüla ta asüba onük tanü senden nungsa benoka olemtep.
Iba senden nung Chief Minister den PWD (Housing & Mechanical) Minister, Urban Development & Municipal Affairs Advisor, MLA Khriehu Liezietsu, Chief Secretary aser tanga tongti ketdangsertem aden, ta Principal Secretary Home-isa metetdaktsü.