AKTD ajanga nisung 500 shi pei tasoli bushia yokogo

Sate nung anempongba ajanga Dimapur yimti nungi pei talidaki moteti alir nisung 500 jungnüa May 11, 2020 nü Mokokchung jila-i Ao Kaketshir Telungjem Dimapur-i achayanga yokogo. Hombarnü AKTD-i achayanga bus ter dak tema yokba mapang tangokba noksa ka yangi angur.

Dimapur, Monupii/May 11 (TYO): Alima ajunga sünga aliba COVID-19 tashidak wara nungi jenbua alitsü mechi state sorkari Nagaland tesem ajungalen senzüsempongba lenmangtem shibanga yur pei talidak/district bushia moteti alir nisung 500 shi May 11, 2020 nü Ao Kaketshir Telongjem Dimapur (AKTD) ajanga anepalua yokogo. Nüburtem, talisa kaketshir aser shikmentsü asoshi jila bushia arua lia iba tenokdangba agütsüba ajanga Aotsür-Aoer nisung 2,000 dak tema pei aliba district, Mokokchung-i moteti timtema aliba ajiteta, sorkari item amala nisungtem meyipa yoktsü asoshi anogo latettsüba nung ajemdaker AKTD-i achayanga parnok pei tasoli bushia yoka arudagi aser ano maneni yoktsü sentong lir.
May 11, Hombarnü Dimapur jila nungi Mokokchung jila bushia bus 15 yokba nung bus ana district administration ajanga agütsü aser tanüngba bus 13 ya AKTD-i lenmang balala nungi bushiteta liasü. Item rongnung Hope Academy, Maple Tree School, Dimapur aser Deputy Commissioner of Police, Zone II, Aotula Imchen, IPS nungertem ajanga bus tenla. Kasa mapang DABA, Minister, Rural Development, Metsubo Jamir, MLA Imkong L. Imchen, MLA Moatoshi, Jemti Mollier aser B. Toshi Aonok nungertemi senotsü tenla aser ano maneni Minister, Higher & Technical Education aser Tribal Affairs, Temjen Imna Along-i Mokokchung-i aor ajak asoshi Kohima nung chiyongtsü renemtsü, ta AKTD tir, Moayanger Jamir-i ashi.
Hombarnü tashibo district administration ajanga item bus ajunga nung totzü inoktsüogo aser sorkari anogo latetja aliba mapang tashi AKTD-i maneni iba maparen nung nüburtem den yariteptsü tebilemba aser tejangraba lir, ta AKTD tir-isa ashi.
AKTD-i anepalua Mokokchung bushia yokba bus tem nungya Aotsür-Aoer kija masü, saka Mokokchung district kübok tesem balala nung alir kin balala densema tependang makai yoker.
Ano maneni Dimapur yimti nungi Mokokchung-i moteti alirtemi AKTD office den mobile number 8837200339/7005461965 ajanga May 12, 2020 nikongdang 5:00 ako tashinung tongtepratep nung ajungtsü, ta AKTD tir-isa ashi.